Fréttir

21.07.2017

1598

Bárður Mýrdal

Nýlega var komið með fullorðinn lunda til okkar í Sæheimum, sem þarf að hreinsa áður en hann fær frelsi á ný.

Fyrir nokkru kom hann að húsi einu í Vík í Mýrdal og bar sig aumlega. Var tekið höfðinglega á móti honum og fékk hann humar og annað góðgæti í gogginn. Eftir nokkra daga virtist hann vera orðinn vel hress og var því gefið frelsi á ný. Næsta dag var hann mættur aftur við þetta sama hús. Við nánari athugun kom í ljós að hann var með smá fitu í fiðrinu og blotnar því þegar hann fer í sjóinn og á þess vegna ekki auðvelt með að finna sér æti.

Nú er hann kominn í Sæheima þar sem hann verður hreinsaður og síðan sleppt þegar hann er tilbúnn til þess. Hann er ótrúlega gæfur af villtum lunda að vera. Hann röltir hinn rólegasti um skrifstofuna og situr jafnvel á öxlum starfsmanna safnsins. Okkur finnst ekki ólíklegt að hann hafi verið innan um fólk í einhvern tíma þegar hann var pysja. Lundinn fékk nafnið Bárður Mýrdal  í höfuðið á bjargvætti sínum og Mýrdalnum.


Til baka