Fréttir

Sami fjöldi pysja

03.10.2015

Í dag var aftur komið með 232 pysjur í vigtun og mælingu hjá pysjueftirlitinu og eru pysjurnar því orðnar 2730 alls. Það voru heppnar pysjur sem fengu húsaskjól hjá mannfólkinu síðustu nótt því að hitastigið var við frostmark og mikil viðbrigði frá notalegri holunni sem þær voru að yfirgefa. Ekki blæs heldur byrlega fyrir þær á morgun því að þá spáir mjög hvassri austanátt og mikilli rigningu.

Fleiri í dag en í gær

02.10.2015

Ekkert lát  virðist vera á pysjufjörinu því að í dag var komið 232 pysjur í pysjueftirlitið. Þær eru því orðnar 2497 samtals. Nokkrar af pysjunum síðustu daga hafa verið bæði litlar og dúnaðar og því þarf að ala þær í nokkra daga áður en þeim er sleppt á haf út. Fólk hefur verið ótrúlega duglegt að taka þessa litlu hnoðra að sér og erum við mjög þakklát fyrir það. Pysjur éta þó ekki kex eins og ætla mætti af myndinni, en kjósa heldur hráan fisk og rækjur t.d. Svo er líka hægt að fá loðnur hjá okkur til að gefa heimaöldum pysjum. Opið verður í Sæheimum um helgina bæði laugardag og sunnudag kl. 10-17.

 

Pysjur í október

01.10.2015

Nú er kominn fyrsti október og enn er verið að koma með talsvert af pysjum í pysjueftirlitið. Í dag var komið með 224 pysjur og er því heildarfjöldi pysja þetta árið kominn upp í 2265. Einstöku sinnum hafa síðustu pysjurnar verið að berast eftirlitinu í október, en þá er hægt að telja þær á fingrum annarar handar. Þetta ár er því mjög óvenjulegt að þessu leyti. Eins og oft áður þegar fer að líða undir lok pysjutímans erum við að sjá nokkuð meira af dúnuðum pysjum.

Lundinn hefur verið að bera fisk sem nefnist rauða sævesla í pysjurnar núna í september og virðist það vera að bjarga miklu. Rauða sævesla var einnig í sjónum við Eyjar haustin 2007 og 2012 þegar einnig var að finnast talsvert af pysjum í bænum. Hún virðist því vera bjargvættur lundans þegar sandsílið bregst.

 

Komnar yfir 2000 pysjur

30.09.2015

Enn eru að berast fjöldi pysja í vigtun og mælingu í pysjueftirliti Sæheima. Í dag var komið með 287 pysjur og er það með ólíkindum síðasta daginn í september. Drengirnir á myndinni komu samtals með 9 pysjur og var ein þeirra pysja númer 2000 í pysjueftirlinu. Aldrei áður hafa pysjurnar verið svo margar frá upphafi pysjueftirlitsins. 

Árið 2015 er stærsta pysjuárið !

30.09.2015

Þá er það orðið ljóst að árið 2015 er orðið stærsta árið í pysjueftirlitinu. Árið 2012 var komið með 1830 pysjur, sem var met, en nú eru pysjurnar orðnar enn fleiri. Í dag klukkan 14:37 var metið slegið og voru það þeir Georg og Ísak sem komu með pysju númer 1831 í mælingu. 

Lengjum opnunartímann

30.09.2015

Auglýstur sumaropnunartími Sæheima er til loka september en vegna þess að pysjurnar eru enn að fljúga í bæinn verður áfram opið á safninu. Rétt í þessu kom pysja númer 1800 og voru það vinkonurnar Herdís og Valdís sem komu með hana í pysjueftirlitið. Það vantar því aðeins 30 pysjur til að jafna fjölda pysja árið 2012.

Stefnir í besta pysjuárið

29.09.2015

Í dag var komið með 217 pysjur í pysjueftirlitið og eru þær því orðnar 1754 talsins. Allt virðist því stefna í að árið 2012 verði toppað, en þá voru pysjurnar 1830 talsins. Er það stærsta árið frá upphafi pysjueftirlitsins, sem hefur verið starfrækt frá árinu 2003. Ef annað eins af pysjum yfirgefa holurnar sínar í kvöld og fljúga í bæinn eins og verið hefur síðustu kvöld þá munum við geta státað af besta pysjuárinu í 13 ár. Myndin er af krökkunum sem komu með pysju númer 1600 í vigtun og mælingu.

Pysjunum fjölgar enn

28.09.2015

Komið var með yfir 200 pysjur í pysjueftirlit Sæheima í dag. Nú eru komnar samtals 1537 pysjur og aðeins þrisvar áður hafa þær verið fleiri frá upphafi eftirlitsins. Við höfum fregnað að enn séu lundar að bera æti í pysjur sínar og því má eiga von á pysjum næstu daga. Við hér í Sæheimum erum mjög spennt að sjá hvort náist að toppa árið 2012 en þá var komið með 1830 pysjur og hafa pysjurnar í eftirlitinu aldrei verið fleiri. Myndin var tekin í lok dagsins og náði þá biðröðin langt fram eftir ganginum.

Heimsmetið slegið

27.09.2015

Þann 12. september 2012 settu starfsmenn Sæheima heimsmet í pysjuvigtun með því að vigta 251 pysju á einum degi. Þetta heimsmet var slegið í dag þegar vigtaðar voru 309 pysjur. Pysjurnar eru nú orðnar 1332 talsins þetta haustið og verður mjög spennandi að sjá lokatölur í pysjueftirlitinu.

Komnar yfir 1000 pysjur

26.09.2015

Nú eru komnar yfir 1000 pysjur í Pysjueftirlit Sæheima og hefur því marki aðeins verið náð fjórum sinnum áður þau 13 ár sem eftirlitið hefur verið starfrækt. Það var árin 2003, 2004, 2007 og 2012. Það voru félagarnir Ísak, Georg og Grettir sem fundu pysjuna. Í lok dagsins voru pysjurnar orðnar 1024 talsins. 

Komnar 730 pysjur

25.09.2015

Í dag var komið með samtals 159 pysjur í pysjueftirlit Sæheima og er þetta því stærsti dagurinn. Pysjurnar eru nú orðnar 730 talsins þetta haustið. Þessir hressu krakkar komu með pysju númar 700 og er full ástæða til að brosa yfir því.

Ferðamenn koma víða að

25.09.2015

Þó liðið sé að lokum september eru erlendir ferðamenn enn að heimsækja eyjarnar og koma þeir víða að. Síðustu dagana höfum við fengið gesti frá Evrópu, Bandaríkjunum, Japan, Singapore, Ísrael, Ástralíu og Nýja Sjálandi. Hollensku ferðamennirnir á myndinni komu til Vestmannaeyja fyrir hálfgerða tilviljun. Þegar þau heimsóttu Sæheima var pysjuvigtun í fullum gangi og fannst þeim frábært að fá að fylgast með og fræðast um pysjutímann. Nú skildu þau hvers vegna íbúar bæjarins gengu um með pappakassa. Þegar þau fóru frá safninu fundu þau pysju og komu að sjálfsögðu með hana í pysjueftirlitið. 

Annar góður dagur í pysjueftirlitinu

24.09.2015

Komið var með samtals 142 pysjur í pysjueftirlit Sæheima í dag og eru því pysjurnar orðnar 571 talsins. Við eigum von á því að næstu daga finnist einnig talsvert af pysjum. Á myndinni má sjá pysju númer 500 ásamt drengjunum sem fundu hana, Þeim Jóhannesi Esra og Róbert Elí.

Náttúruvísindadagar

24.09.2015

Nú standa yfir Náttúruvísindadagar hjá krökkunum í 10. bekk GRV. Fengu þau fyrirlestra um marhnút, lunda og lúpínu og lögðu síðan leið sína í Sæheima og unnu verkefni um pysjueftirlitið. Tóku þau viðtöl við starfsfólkið og spurðu þau spjörunum úr og vildu fá upplýsingar um tölur síðustu ára í pysjueftirlitinu. Margir af krökkunum komu með pysjur í vigtun og mælingu í leiðinni.

Pysja á Sóla

23.09.2015

Þessar hressu fjögurra ára stelpur fundu pysju á leikskólanum Sóla. Að sjálfsögðu marsereðu þær með hana í pysjueftirlit Sæheima. Nú er pysjan komin út í sjó með hinum pysjunum. 

Komnar yfir 400 pysjur

23.09.2015

Nú eru komnar samtals 429 pysjur í pysjueftirlit Sæheima. Þó að þetta muni seint teljast gott pysjuár þá gleðjumst við yfir því að pysjurnar eru miklu fleiri en í fyrra, en þá voru þær 99 talsins og aðeins 30 árið þar áður. Í dag var góður dagur í pysjueftirlitinu en alls var komið með 146 pysjur. Þá var einnig komið með þyngstu pysjuna sem komið hefur verið með þetta árið en hún fannst á Eiðinu í gærkvöldi og var 318 grömm að þyngd. Við vonum að þessi þróun haldi áfram og viljum endilega fá bæði fleiri og stærri pysjur. Á myndinni má sjá pysju númer 400 ásamt finnandanum, honum Karli Jóhanni.

Lundi með æti

22.09.2015

Pysjur eru enn að berast í pysjueftirlit Sæheima og í dag var komið með 58 pysjur. Þær eru því orðnar samtals 284 þetta árið. Lundinn er enn að bera æti í pysjurnar og eigum við því von á fleiri pysjum næstu daga. Er þetta talsvert seinna en verið hefur undanfarin ár. Myndina tók Ruth Zolen í Stórhöfða um helgina og greinilegt að einhver heppin pysja var í þann mund að fá góða máltíð.

Komnar 165 pysjur

20.09.2015

Enn eru að berast pysjur í pysjueftirlit Sæheima og eru þær nú orðnar 165 talsins. Eru það nokkuð fleiri pysjur en komu allt tímabilið í fyrra, en þá fundust  99 pysjur. Þær eru ákaflega seint á ferðinni í ár og eru talsvert léttari en undanfarin ár.

Pysjurnar sem komið hefur verið með í pysjueftirlitið um helgina eru þó nokkuð þyngri en þær sem komu fyrstu dagana. Í lok dags þann 15. september var meðalþyngdin skoðuð og var þá aðeins 207,5 grömm en er núna búin að tosast upp í 224,7 grömm. Þetta er langt frá því að vera ákjósanleg meðalþyngd, en er að færast í rétta átt og vonandi heldur þyngdin áfram að aukast.

Opið verður í Sæheimum alla daga kl. 10-17 alveg út september og um að gera að koma með pysjurnar í vigtun og mælingu áður en þeim er sleppt á haf út.

Pysjueftirlitið í fullum gangi

16.09.2015

Nú eru komnar samtals 37 pysjur í Pysjueftrilit Sæheima. Það eru því komnar fleiri pysjur í pysjueftirlitið núna en komið var með allt pysjutímabilið árið 2013, en þá komu einungis 30 pysjur. Þegar komið er með pysjur til okkar þá eru þær bæði vigtaðar og vængmældar. Þegar þessar tölur eru skoðaðar saman þá gefur það ákveðna mynd af holdafari pysjanna.

Pysjurnar í ár eru nánast allar mjög léttar en samt sem áður ódúnaðar. Vænglengdin aftur á móti er eins og í meðal ári. Þetta segir okkur það að pysjurnar núna eru horaðar.  Pysjurnar sem enn eru í holum sínum eru vonandi að fá nóg að éta þannig að þær verði aðeins pattaralegri en þær sem þegar eru komnar.

Krakkarnir hafa verið mjög dugleg að koma með pysjur í mælingu og þökkum við kærlega fyrri það. Inni á facebook síðu Sæheima má sjá myndir af nokkrum þessara krakka með pysjurnar sem þau fundu.

Aðmírálsfiðrildi

15.09.2015

Með fyrstu haustlægðunum berst oft nokkur fjöldi skordýra til Íslands sem alla jafna sjást þar ekki. Eitt þessara skordýra er aðmírálsfiðrildið, sem hefur nánast verið árlegur gestur frá því að það fannst fyrst hérlendis árið 1901. Við í Sæheimum höfum frétt af nokkuð mörgum aðmírálsfiðrildum á Heimaey síðustu daga og starfsmenn Kubbs náðu að handsama eitt þeirra og færa safninu.

Aðmírálsfiðrildi hafa mjög mikla útbreiðslu. Þau finnast um nánast alla Evrópu en einnig í Litlu Asíu og Íran, Norður Afríku, mestalla Norður Ameríku og niður til Guatemala og Haití. hér á landi hafa þau helst fundist á láglendi sunnanlands. Þau eru miklir fluggarpar og hafa ríkt flökkueðli. Þau eru að berast hingað til lands allt sumarið en algengast er að þau komi hingað í september með sterkum sunnanvindum. Ekki er vitað til að þau hafi náð að fjölga sér hérlendis.

Nánar á:  http://www.ni.is/poddur/flaekingar/poddur/nr/1316