Fréttir

Vorhugur í Tóta

15.03.2016

Greinilega er kominn vorhugur í Tóta því hann er um þessar mundir að skipta yfir í sumarbúning sinn. Fyrstu merki þess eru að vangarnir eru smám saman að lýsast. Á næstu dögum fer hann að fá meiri lit í gogginn, húðsepinn í goggvikunum mun stækka og fá meiri lit, hvíta spöngin við nefrótina birtist, þríhyrndu plöturnar umhverfis augun koma í ljós og fætur hans verða gulari. Það er gaman að fylgjast með þessum breytingum, því alla jafna fáum við ekki tækifæri til að fylgjast með lundum í búningaskiptum. Þegar villtu lundarnir koma til landsins í lok apríl hafa þessar breytingar þegar átt sér stað og eru þeir komnir í varpbúning sinn. 

Fyrsti hópur ársins

22.02.2016

Það sem af er árinu hefur verið mjög rólegt hjá Sæheimum, sem og öðrum aðilum í ferðaþjónustu í Vestmannaeyjum. Smám saman er þetta þó aðeins að glæðast og með viku hverri koma fleiri ferðamenn að heimsækja okkur.

Í dag fengum við hóp fólks, sem var langt að komið í heimsókn á safnið. Þau eru frá Shanghæ í Kína og var þetta fyrsti hópur ársins hjá okkur. Komu þau með flugi í blíðunni í morgun og voru í skoðunarferð með Eyjar Tours og voru Sæheimar þeirra fysta stopp.  Þau voru mjög hrifin af Tóta og eins og sjá má á myndinni var hann sömuleiðis alsæll með gestina. 

Wandering Puffin

03.02.2016

Í dag fékk safnið góða heimsókn, en þar var á ferðinni Jamie Bachrack frá Minnesota í Bandaríkjunum. Rekur hann ferðaskrifstofuna "Wandering Puffin" og var að koma í þriðja skipti til Vestmannaeyja. Hann er mjög hrifinn af eyjunum og stefnir á að koma aftur í september. Vonast hann þá til að geta tekið þátt í að bjarga lundapysjum.

Hann er mjög hrifinn af lundum og eins og sést á myndinni er hann afskaplega ánægður með hann Tóta okkar. Spurning hvor þeirra brosir breiðar, en Tóti er alltaf himinlifandi yfir því að fá gesti yfir vetrartímann.

Lundapysja í janúar

13.01.2016

Þeir Ragnar Þór og Valur Már, skipverjar á Kap VE, komu með lundapysju á safnið í dag. Hafði hún komið um borð hjá þeim á miðunum vestur  af Snæfellsnesi. Þeir höfðu áhyggjur af því að pysjan hefði fengið á sig olíu um borð áður en hún náðist og vildu því ekki sleppa henni. Var það rétt ákvörðun hjá þeim því að pysjan blotnað inn að skinni þegar hún var látin synda með lundunum sem fyrir eru á safninu. Þarf því að hreinsa hana áður en henni verður sleppt á ný. Sigrún Anna rétti þeim hjálparhönd við að afhenda pysjuna. 

Frítt inn á Þrettándahátíð

08.01.2016

Núna um helgina verður þrettándahátíð haldin í Vestmannaeyjum. Hápunktur hennar er þegar jólasveinar, tröll, álfar og fleiri kynjaverur dansa í kring um bálköst áður en þau halda til síns heima. Fleira skemmtilegt verður í boði og m.a. verður opið á söfnum bæjarins. Sæheimar verða opnir kl. 13-16 á laugardeginum 9. janúar og verður frítt inn.

Jólarjúpurnar á safninu eru spenntar að hitta sem flesta krakka á laugardaginn. 

Haftyrðill

27.12.2015

Á jóladag fannst haftyrðill við Hraunbúðir, sem náði ekki að hefja sig til flugs. Finnendur hans komu með hann daginn eftir í Sæheima þar sem fuglinn var vigtaður. Hann var frekar léttur en virtist að öðru leyti vera hinn hressasti. Var honum því gefið smávegis æti og honum síðan sleppt á haf út.

Haftyrðlar eru minnstu svartfuglarnir og eru aðeins um 150 g að þyngd. Til viðmiðunar eru lundar um 500 g og langvíur um 1 kg. Haftyrðlar eru hánorrænir fuglar og verptu áður á nokkrum stöðum við norðanvert landið. Til skamms tíma verptu nokkur pör í Grímsey. Vegna hlýnandi veðurfars eru þeir nú alveg horfnir. Þeir eru nokkuð algengir norðan við okkur eins og á Grænlandi, Jan Mayen og Svalbarða. Yfir vetrartímann halda haftyrðlar sig helst við hafísröndina en sjást þó oft hér við land, sérstaklega eftir norðanáttir. Í vondum veðrum geta þeir hrakist langt inn á land.

Heimild: Íslenskur fuglavísir eftir Jóhann Óla Hilmarsson. MM 2011.

Jólakveðja

23.12.2015

Starfsfólk Sæheima sendir gestum og velunnurum safnsins bestu jólakveðjur og þakkir fyrir innlit og gjafir á árinu. Vonum að nýja árið verði gott og að við sjáum ykkur sem oftast á safninu. Lundarnir senda einnig sínar bestu jólakveðjur, sérstaklega til allra krakkanna sem komu í heimsókn á árinu.

Þar sem laugardagur lendir á öðrum degi jóla og safnið því lokað, höfum við ákveðið að hafa safnið opið í staðinn á sunnudeginum 27. desember kl. 13 -16.

4. bekkur í heimsókn

23.11.2015

Í dag komu krakkarnir í 4. bekk GRV í heimsókn á safnið. Ætluðu þau að skoða karfa, sem er fiskur árgangsins. Ekki eru lifandi karfar á safninu og því skoðuðu þau uppstoppaðan karfa sem þar er. Karfar lifa á talsverðu dýpi og eru sérstklega viðkvæmir fyrir þrýstingsmuninum sem verður þegar þeir eru dregnir þaðan og upp á yfirborðið. Það er því nánast ómögulegt að fá lifandi karfa á safnið. Stöku sinnum fáum við þó lifandi litla karfa, en hann lifir á nokkuð grynnra vatni en frændur hans af öðrum karfategundum. Krakkarnir fóru einnig á útibú Hafrannsóknastofnunar þar sem þau fengu að horfa á þegar karfi var krufinn. Væntanlega eru þau því margs vísari um karfa.

Kjáninn vekur athygli

23.11.2015

Fáir fiskar hafa hlotið eins mikla athygli fjölmiðla og litli kjáninn okkar, sem áhöfnin á Þóruni Sveinsdóttur VE færði safninu að gjöf í síðustu viku. Fjallað var um hann í flestum stærri fjölmiðlum landsins og í síðasta útsvarsþætti var spurt um ætterni hans, en hann er að sjálfsögðu af kjánaætt. Ekki nóg með það heldur var kjáninn til þess að Ómar Ragnarsson samdi ljóð um kjána sem hann birti á bloggsíðu sinni.

Kjána undirdjúpa ei ég þekki

en aðra kannski betur, því er ver,

því sumir kjánar ættu bara ekki

ofansjávar nokkurn rétt á sér.

Komið með kjána

19.11.2015

Áhöfnin á Þórunni Sveinsdóttur VE fékk óvenjulegan fisk er þeir voru að veiðum suðvestur af Surtinum. Fiskurinn líktist nokkuð skötusel en var mun minni og rauður að lit. Reyndist þetta vera fiskur sem kallaður er kjáni og er af kjánaætt. Fiskar þessarar ættar eru botnfiskar og lifa sumir allt niður á 2000 metra dýpi. Þeir finnast í öllu höfum nema íshöfunum. Kjáninn er eina tegund þessarar ættar sem hefur veiðst á Íslandsmiðum. Kjánar eru í raun skyldir skötuselum en báðar tegundirnar eru af ættbálki sem kallast kjaftagelgjur.

Kjánar hafa mikla útbreiðslu og finnast beggja vegna Atlantshafsins. Einnig finnast þeir í Miðjarðarhafinu og nokkrir kjánar hafa veiðst við Íslandsstrendur. Þeir fiskar sem hafa veiðst hér við land hafa verið á 220 til 1050 metra dýpi en kjáninn sem þeir á Þórunni veiddu var á um 600 metra dýpi.

Kjáninn sem komið var með á safnið var 19,5 cm en þeir geta orðið um 30 cm langir. Kjánar hafa stóran og vel tenntan kjaft og mjög stór augu sem eru staðsett ofan á höfðinu. Milli augnanna hafa þeir smásepa með ljósfæri á endanum. Þeir eru því vel búnir til að veiða lítil botndýr sem þeir laða til sín með ljósinu á höfðinu.

Kjáni þessi mun verða stoppaður upp og hafður til sýnis hér á safninu.

Heimild: Íslenskir fiskar eftir Gunnar Jónsson og Jónbjörn Pálsson. Útgefin af Máli og Menningu árið 2013

Svölur enn á ferðinni

18.11.2015

Þó komið sé fram yfir miðjan nóvember eru enn að finnast ungar stormsvölu og sjósvölu í bænum. Í dag var komið með til Sæheima stormsvölu sem var 29 grömm og sjósvölu sem var 36 grömm. Ingvar Atli hjá Náttúrustofu Suðurlands merkti þær báðar og sleppti þeim.

2. bekkur í heimsókn

12.11.2015

Krakkarnir í 2. bekk GRV komu í heimsókn á safnið í morgun. Helsti tilgangur ferðarinnar var að skoða kolana á safninu, en kolinn er einmitt fiskur árgangsins. Plantan er hvítsmári og fuglinn þeirra er fýllinn.

Kolunum á safninu var gefið að éta og höfðu börnin algjöra þögn á meðan svo þau gætu heyrt smellina sem kolar mynda þegar þeir finna æti. Smellirnir eru nógu háir til að þeir heyrist í gegn um glerið í búrinu og tilgangur þeirra er að vísa öðrum kolum að ætinu. 

Börnin kíktu auðvitað líka á hin dýrin á safninu og það má segja að einbeitingin hafi skinið úr andlitum þeirra þegar Örn sýndi þeim hvernig best er að halda á krabba.  

Glæsileg gjöf

12.11.2015

Gunnar Júlíusson hélt sýningu um Safnahelgina, sem opnuð var í Sæheimum 6. nóvember. Þar sýndi hann tölvugerð myndverk sem prentuð voru á stór segl og hanga úr loftum fiskasalarins og fuglasalarins. Þema verkanna er dýrin á safninu. Gunnar gaf safninu þessi flottu verk til eignar og er ekki spurning að þau eiga eftir að skreyta safnið um ókomin ár. Bestu þakkir Gunnar fyrir rausnarlega gjöf og skemmtilegt samstarf. 

Sýning Gunnars mun verða opin áfram í Sæheimum og þeir sem misstu af henni um síðustu helgi geta bætt það upp og komið á safnið, sem verður opið á laugardögum kl. 13-16.

Á myndinni er Gunnar ásamt fjölskyldu sinni við nokkur verka sinna í Fiskasal Sæheima. Gunnar gerði einnig minni myndir af verkunum, sem eru til sölu í BK-Gler.

Sýningaropnun

06.11.2015

Sýning Gunnars Júlíussonar "Hvorki fugl né fiskur" var opnuð með pompi og prakt í Sæheimum í kvöld. Gunnar sýnir 10 tölvugerð myndverk af dýrunum á safninu. Verkin eru prentuð á segl sem eru 70 cm á breidd og 250 cm á hæð. Þau njóta sín mjög vel í sölum safnsins þar sem lofthæð er mikil. Vel var mætt á opnunina og stemmningin mjög notaleg. Þetta er skemmtileg og flott sýning sem sýnir dýrin á safninu í nýju ljósi. Enginn sem hefur áhuga á dýrum og myndlist ætti að láta hana fram hjá sér fara.

Sýningin verður opin bæði laugardag og sunnudag kl. 13-16 og frítt er inn á safnið þessa helgi.

Safnahelgin framundan

05.11.2015

Nú er undirbúningur fyrir Safnahelgina í Vestmannaeyjum í fullum gangi. Dagskrá helgarinnar er fjölbreytt að venju. Í Sæheimum verður sýning á tölvugerðum myndverkum Gunnars Júlíussonar af dýrum safnsins, sem nefnist "Hvorki fugl né fiskur" 

Síðustu vikur, eftir að lundapysjufjörinu lauk, hafa starfsmenn verið í óða önn að gera hausthreingerninguna á safninu og gera klárt fyrir Safnahelgina. Nú eru þeir að vinna að uppsetningu listaverkanna ásamt listamanninum. Á myndinni má sjá þá félaga Örn og Gunnar setja upp myndverkin í fiskasalnum alveg skælbrosandi.  

Opnun sýningarinnar verður föstudagskvöldið 6. nóvember kl 20:00 og eru allir velkomnir. Sýningin verður einnig opin kl. 13:00-16:00 bæði laugardag og sunnudag. Frítt er inn á safnið þessa helgi.

Uppbyggingarsjóður Suðurlands veitti styrk til sýningarinnar og kunnum við þeim bestu þakkir fyrir.

Lokatölur í pysjueftirlitinu

30.10.2015

Nú er komin vika síðan komið var með tvær síðustu pysjurnar í pysjueftirlitið og því óhætt að koma með lokatölur. Heildarfjöldinn var 3831 pysja sem var vigtuð og vængmæld í Sæheimum. Er það mesti fjöldi frá upphafi pysjueftirlitsins, sem hófst árið 2003. En eins og þeir muna vel sem komnir eru á fullorðinsár, þá er þetta þó langt frá því að vera eins margar pysjur og voru þegar allt lék í lyndi hjá lundanum. Auðvitað eru þó allir ánægðir með að fjöldi pysja sé á uppleið og vonandi verður áframhald á.

Meðalþyngd pysjanna í ár var 237,5 grömm, sem er því miður ekki mjög góð meðalþyngd. Hún mætti gjarnan vera nær 300 grömmunum. Pysjurnar voru mjög léttar í upphafi og við lok tímabilsins, eða innan við 210 grömm. Þyngsta pysjan var 336 grömm en sú léttasta aðeins 121 gramm.

Það sem er óvenjulegast við þetta pysjutímabil er hve pysjurnar voru seint á ferðinni. Fyrsta pysjan kom ekki fyrr en 8. september og þær síðustu þann 23. október eða daginn fyrir síðasta vetrardag. Þetta hefur ekki gerst áður svo vitað sé til en gaman væri að skoða gamlar heimildir og sjá hvort eitthvað finnst um svo síðbúnar pysjur.

Merktar voru um 700 pysjur og það verður spennandi að sjá hverjar endurheimtur þeirra verða. Margt bendir til að nokkuð dragi úr lífslíkum pysjanna ef þær eru léttar og sömuleiðis ef þær eru seint á ferðinni. Vonandi afsanna pysjurnar í ár þessa fullyrðingu. 

Enn koma pysjur

23.10.2015

Þótt ótrúlegt megi virðast þá er enn verið að koma með pysjur í pysjueftirlitið. Komið var með tvær pysjur í gær og einnig í dag. Heildarfjöldinn er því kominn upp í 3831 pysju, eða 2001 pysju meira en árið 2012, sem er stæsta ár pysjueftirlitsins fram til þessa. Nú er orðið nokkuð kalt fyrir litlar lundapysjur að vera á vappi og spáir enn kólnandi um helgina. Pysjan á myndinni fylgdist með umferðinni á Heiðarveginum og kannski spáði hún líka í veðurhorfurnar. Hún hefur líklega aldrei heyrt talað um  gluggaveður enda vildi hún ólm komast út.

Lengi er von á einni

21.10.2015

Í gær gerðum við því skóna að líklega væri síðasta pysja haustsins fundin og komin á haf út. En lengi er von á einni og í dag kom hún Rakel með pysju sem hún fann inni í Herjófsal í gærkvöldi. Eins og vel flestar pysjurnar sem komið hefur verið með síðustu daga var pysjan frekar létt. Heildarfjöldinn er nú kominn upp í 3827 pysjur.

Síðasta pysjan ?

20.10.2015

Í gær var einungis komið með tvær pysjur í pysjueftirlitið og enga í dag. Það er því spurning hvort að pysjufjörinu þetta árið sé nú lokið. Reyndar ekki seinna vænna þar sem kominn er 20. október.

Þessar stelpur eru svo heppnar að eiga ömmu í Vestmannaeyjum, sem þær heimsóttu um helgina. Að sjálfsögðu var farið í pysjuleit og fundu þær eina pysju á föstudagskvöldinu. Var hún mjög lítil og dúnuð og var því höfð í gistingu í Sæheimum í þrjá daga. Þær sóttu pysjuna sína í dag og hafði hún þá þyngst talsvert og losnað að mestu við dúninn. Hafði hún einnig verið sett á sundnámskeið þar sem hún stóð sig með stakri prýði. Stelpurnar náðu því að sleppa pysjunni sinni áður en þær héldu heim á leið. 

Fimm pysjur í dag

18.10.2015

Í dag var komið með fimm lundapysjur í pysjueftirlitið. Heildarfjöldi pysja þetta haustið er því kominn upp í 3824. Mæðgurnar Ester og Bríet komu með tvær pysjur í vigtun og mælingu í dag. 

Safnið mun verða opið kl. 13-16 næstu daga eða þar til síðasta pysja haustsins lætur sjá sig.