Fréttir

Olíublautar pysjur fá góða hjálp

14.09.2017

Við í Sæheimum kynnum til leiks nýjan starfsmann, sem mun aðstoða okkur næstu daga við pysjueftirlitið. Það er Karen Lynn Velas líffræðingur frá Davis í Kaliforníu. Hún hefur m.a. unnið við að hreinsa olíublauta fugla af ýmsum tegundum eftir mengunarslys.

Mun hún taka starfsfólk Sæheima á námskeið á þessu sviði. Það er mikill fengur fyrir okkur að fá sérfræðing til að kenna okkur réttu handtökin við hreinsun fugla sem lennt hafa í olíu eða grút. 

Á hverju ári eru einhverjar pysjur sem lenda í olíu eða grút og núna erum við með um 15 pysjur sem þarf að hreinsa og endurhæfa áður en hægt er að sleppa þeim. Auk þeirra eru tveir fullorðnir lundar og ein dúfa sem þarf að hreinsa.

Á myndinni eru þau Karen og Eldur A. Hansen, sem einnig hefur rétt okkur hjálparhönd við pysjueftirlitið. 

Talsvert færri pysjur í dag

13.09.2017

Í dag var einungis komið með 138 pysjur í eftirlitið og eru það talsvert færri pysjur en komið hefur verið með undanfarna daga. Við gleðjumst þó yfir því að nú er heildarfjöldi pysja kominn upp í 4430 pysjur og er það mesti fjöldi frá upphafi eftirlitsins.

Skrofur og sjósvölur

13.09.2017

Það eru ekki einungis lundapysjur sem fljúga að ljósunum í bænum. Ungar skrofu, sjósvölu og stormsvölu gera það einnig og þurfa oft á hjálp okkar mannfólksins að halda til að komast út á sjóinn. Þessir fuglar eru yfirleitt nokkuð seinna á ferðinni en pysjurnar. 

Ef að þeir sem eru í pysjuleit koma auga á þessa unga er um að gera að bjarga þeim og einnig að koma með þá í pysjueftirlitið. Nú þegar hefur verið komið með 15 skrofuunga og 19 sjósvöluunga til okkar í Sæheimum í vigtun og mælingu og hafa margir þeirra verið merktir.

Ennþá talsvert af pysjum

12.09.2017

Enn er líf og fjör í pysjueftirlitinu og í dag var komið með 245 pysjur til okkar í Sæheima. Heildarfjöldinn er því kominn upp í 4291 pysju og er það mesti fjöldi frá upphafi pysjueftirlitsins. Það er áhugavert hvað dagarnir eru misjafnir, en í dag komu 95 pysjum fleiri en í gær.  

Pysjurnar komnar yfir 4000

11.09.2017

Í dag skriðum við yfir 4000 pysjur og eru 4046 pysjur í heildina þar sem við vigtuðum 150 pysjur í dag. Óvenju mikill munur er á deginum í gær og í dag á fjölda vigtaðra pysja. 

Ólafur Már Haraldsson kom með pysju númer 4000.

Heimsmetið er slegið!

10.09.2017

Í dag var komið með 363 pysjur í vigtun, mun fleiri en í gær og heimsmetið frá 2015 er því fallið! 3896 pysjur hafa verið vigtaðar í ár! Meðalþyngdinn á pysjunum er mjög góð 286 grömm og ljóst er að það er nóg eftir af pysjufjöri. 

Þess má geta að þetta er sjötti dagurinn sem við förum yfir heimsmetið frá því í fyrra yfir vigtaðar pysjur á dag.

Ómetanleg samvinna

09.09.2017

244 pysjur vigtaðar í dag, heildarfjöldinn orðin 3533 sem þýðir að við þurfum ekki nema 295 pysjur til að slá gamla heimsmetið. Í dag kom einnig bandaríska stöðin ABC til að taka upp efni bæði fyrir sjónvarp og útvarp. 

Takk kærlega kæru bjargvættir fyrir góðar undirtökur og samviskusamlegar heimsóknir á safnið með pysjurnar ykkar, ómetanleg samvinna!

Flottur dagur í Sæheimum

08.09.2017

Dagurinn í dag var betri en gærdagurinn, 263 pysjur voru vigtaðar sem gerir heildarfjöldann 3289, okkur vantar nú einungis 539 pysjur til að slá heildarfjölda metið okkar sem náðist árið 2015 sem er 3827.

Eftir daginn í dag er meðalþyngdin á pysjunum í ár 285 grömm sem er hæðsta meðalþyngd síðan pysjueftirlitið hóf göngu sína árið 2003. 

Pysjurnar komnar yfir 3000

07.09.2017

Heldur færri pysjur komu á vigtina í dag, 189 pysjur voru vigtaðar og er heildarfjöldinn því orðin 3026. Þyngdin á pysjunum hefur sjaldan verið eins góð og í ár. 

Fleiri pysjur en í fyrra

06.09.2017

Nú er búið að koma með 2837 pysjur í pysjueftirlit Sæheima og eru því komnar fleiri pysjur í ár en komið var með í fyrra. Þá var komið með 2639 pysjur og var það næst mesti fjöldi frá upphafi pysjueftirlitsins árið 2003. 

Í dag var komið með 347 pysjur til okkar og ef pysjufjörið heldur svona áfram náum við jafnvel að toppa árið 2015, en þá var komið með 3831 pysju og er það mesti fjöldi pysja í eftirlitinu. 

Á myndinni eru þau Sindri Þór og Anna Kolbrún með eina af pysjunum sínum.

Ennþá mikið af pysjum

05.09.2017

Dagurinn í dag var aðeins rólegri hjá pysjueftirlitinu en síðustu dagar, en samt sem áður nokkuð fjörugur. Komið var með 344 pysjur til okkar í dag og er því heildarfjöldinn kominn upp í 2.460 pysjur. Það er ekki nokkur spurning að við munum toppa árið í fyrra í pysjufjölda, en þá var komið með 2.639 pysjur og var það næst mesti fjöldi frá upphafi pysjueftirlitsins. 

Enn er mikill fjöldi pysja að fljúga í bæinn og ein fjölskylda kom til okkar með 40 pysjur eftir gærkvöldið.

Annasamur dagur

04.09.2017

Mjög svo annasamur dagur var í Sæheimum í dag. Ekki aðeins voru vigtaðar 420 pysjur, sem er næst mesti fjöldi sem vigtaður hefur verið á einum dagi, heldur voru líka merktar 267 pysjur. Einnig var hér á ferðinni kvikmyndatökulið frá CBS Sunday News, sem er hér við tökur á fréttaþætti um pysjubjörgun í Vestmannaeyjum.

Heildarfjöldinn er kominn upp í 2145 pysjur.

Komnar 1725 pysjur

03.09.2017

Í dag voru 411 pysjur vigtaðar og vængmældar í pysjueftirliti Sæheima. Heildarfjöldinn er því kominn upp í 1724 pysjur og því greinilegt að þetta verður eitt af bestu árunum frá því pysjueftirlitið hóf göngu sína.

Þó að heimsmetið frá í gær hafi ekki verið slegið þá slógum við þyngdarmetið enn og aftur, en bræðurnir Georg og Ásgeir Ingimarssynir komu með 387 gramma pysju í dag. Almennt eru pysjurnar sem komið er með vel gerðar.

Heimsmetið rækilega slegið

02.09.2017

Við starfsfólk Sæheima höfðum tröllatrú á að heimsmet í pysjuvigtun yrði slegið um helgina og erum búin að vera mjög spennt. 

Í fyrra settum við heimsmet þann 10. september þegar við vigtuðum 310 pysjur á einum degi, en í dag var komið með 444 pysjur í eftirlitið og heimsmetið því rækilega slegið. Þar af voru 135 pysjur merktar. Dagurinn hefur því verið mjög fjörugur á fiskasafninu og margir rétt okkur hjálparhönd. Fjöldinn í ár er því kominn upp í 1314 pysjur.

Tóti er búinn að fara yfir tölurnar og segir að þetta sé rétt talið hjá okkur.

225 pysjur í dag

01.09.2017

Komið var með 225 pysjur í pysjueftirlitið í dag, en eru það aðeins færri en komið var með í gær. Heildarfjöldinn er kominn upp í 870 pysjur. Við erum þó enn að vonast til að slá heimsmetið frá í fyrra, sem var 310 pysjur á einum degi og hvetjum því alla til að koma með pysjurnar í Sæheima eða vigta þær heima og senda okkur niðurstöðurnar.

Á myndinni eru þær Berta og Inga Birna Sigursteinsdætur sem komu með 357 gramma pysju en það er sú þyngsta á þessu tímabili. Við erum nokkuð ánægð með hvað pysjurnar eru almennt góðar og er meðalþyngd þeirra sem af er tímabilinu 270 grömm.

Rúmlega 100 fleiri en í gær

31.08.2017

Þá er heildarfjöldi pysja kominn upp í 644 pysjur. Í dag var komið með 263 pysjur í pysjueftirlitið, sem eru rúmlega 100 fleiri en komið var með í gær. Með sama áframhaldi mun heimsmetið frá í fyrra verða slegið um helgina. En þann 10. september í fyrra voru vigtaðar og vængmældar 310 pysjur í pysjueftirliti Sæheima og var það heimsmet í pysjuvigtun. Mjög hröð aukning hefur verið milli daga hjá okkur núna og miklar líkur á að takmarkið náist.

Á myndinni eru systurnar Birna María, Arna Hlíf og Erla Unnarsdætur.

160 pysjur í dag

30.08.2017

Það er greinilegt að pyjutíminn er kominn á gott skrið því að í dag var komið með 160 pysjur til okkar í pysjueftirlitið og eru það tvöfalt fleiri pysjur en komð var með í gær. Heildarfjöldinn er kominn upp í 381 pysju.

Aftur voru margar þeirra að finnast ofarlega í bænum m.a. við Suðurgarð, Olnboga, Steinstaði, Eldheima og fyrir ofan Klaufina. Það var ánægjulegt að sjá að meðalþyngd pysjann hefur heldur betur lagast og voru óvenju margar um og yfir 300 grömm að þyngd. Sú þyngsta sem af er tímabilinu kom til okkar í dag og reyndist vera 338 grömm. 

Á myndinni eru bræðurnir Rómeó Máni og Hrafn Mikael.

Pysjunum fer ört fjölgandi

29.08.2017

Komið var með 81 pysju í pysjueftirlitið í dag. Samtals eru pysjurnar því orðnar 220 í ár. Fundarstaðirnir í gærkvöldi voru dreifðari en síðustu daga og voru pysjurnar að fljúga ofar í bæinn. 

51 pysja í dag

28.08.2017

Komið var með 51 pysju í vigtun í dag, pysjurnar eru því orðnar 138 eftir daginn en pysju númer 100 fundu þau Sigdór og Díana.

Þyngsta pysjan sem af er mætti í eftirlitið í dag, en hún var 320 grömm en það voru systkinin Embla Harðardóttir og Gauti Harðarson sem komu með hana. 

Pysjunum fjölgar með degi hverjum

27.08.2017

Alls var komið með 38 pysjur í pysjueftirlit Sæheima í dag og eru það tvöfalt fleiri pysjur en komu í gær. Þá eru pysjurnar orðnar 86 talsins. Pysjuförið er greinilega að komast í gang og verður spennandi að sjá hvort aukningin haldi áfram næstu daga.

Á myndinni eru þau Heiða, Georg Ingi, Írena, Lenja og Hafdís með pysju sem þau fundu við Skýlið í gærkvöldi.