Fréttir

Gleðilegt sumar

19.04.2018

Í tilefni af sumarkomunni bauð Vestmannaeyjabær bæjarbúum að heimsækja söfn bæjarins. Margir nýttu sér þetta góða boð og alls komu 185 gestir í Sæheima í dag. Einnig fréttist af komu lundans til Vestmanneyja og er það staðfesting á því að sumarið er raunverulega komið, en ekki einungis samkvæmt dagatalinu.

Myndina tók Ruth Zolen fyrir nokkrum árum af lundapari í tilhugalífinu, en ástin mun blómstra í brekkunum næstu vikurnar.

Sumardagurinn fyrsti

18.04.2018

Sumardaginn fyrsta er opið í Sæheimum klukkan 13-16. Vestmannaeyjabær býður bæjarbúum að heimsækja söfn bæjarins sér að kostnaðarlausu og einnig er frítt fyrir þá í sundlaugina. Góður dagur framundan.

Valdabarátta

14.04.2018

Áhöfnin á Drangavík kom með glæsilegan hlýra að landi í gærmorgun og færði Sæheimum að gjöf. Var hann settur í búr með öðrum hlýra sem Drangavíkin kom með í haust. Sá sem fyrir var í búrinu lyftist allur upp þegar hann koma auga á þann nýkomna og var greinilega ekki ánægður með þessa viðbót. Hann reisti upp bakuggann og varð mjög ógnandi og réðst síðan til atlögu. Eftir nokkur slagsmál náðist sátt en greinilegt að sá gamli ræður ríkjum þarna enda búinn að vera nokkra mánuði hjá okkur og lítur á búrið sem sitt yfirráðasvæði.

Góð gjöf til safnsins

09.04.2018

Áhöfnin á Drangavík VE færði Sæheimum góða gjöf er þeir komu að landi í morgun. Um var að ræða fjölda gaddakrabba, humra, tröllakrabba og kolkrabba. Dýrin eru nú öll komin í ný heimkynni á safninu. Það er nauðsynlegt fyrir safnið að fá gjafir frá sjómönnum og erum við mjög þakklát þegar þeir hafa okkur í huga og koma færandi hendi.

Opnunartími í apríl

04.04.2018

Lóan er komin og siglt er til Landeyjahafnar, sem þýðir það að sumarið er í nánd. Sumaropnunartími safnsins, þegar opið er alla daga vikunnar,  hefst 1. maí. Fram að þeim tíma ætlum við að koma á móts við ferðamenn og aðra sem vilja heimsækja safnið, með því að hafa opið alla virka daga kl 14-15 og á laugardögum kl. 13-16. Einnig er alltaf hægt að hafa samband við okkur ef þessir tímar hentar engan vegin og við reynum þá í sameiningu að finna tíma sem hentar betur.

Kolkrabbi

28.03.2018

Áhöfnin á Þórunni Sveinsdóttur VE kom að landi í gærkvöld með lítinn kolkrabba í fórum sínum, sem þeir höfðu náð að halda lifandi. Í Sæheimum var hann settur í búr þar sem annar kolkrabbi er fyrir, en sá hefur nýlega hrygnt í holuna sína. Því má telja líklegt að sá nýkomni fái ekki hlýlegar móttökur ef hann hættir sér of nærri.  

Opnunartími um páskana

28.03.2018

Á fimmtudag er safnið opið klukkan 14-15 og á laugardag klukkan 13-16. Tóti lundi og starfsfólkið óskar öllum gleðilegra páska.

Óvenjuleg rauðspretta

21.03.2018

Áhöfnin á Maggý VE færði Sæheimum góða gjöf er þeir komu að landi í gærkvöldi. Reyndist þetta vera óvenjulegt litarafbrigði af rauðsprettu, sem veiddist í Álnum milli lands og Eyja. Var hún sett í búrið með rauðsprettunum sem fyrir eru á safninu og má segja að hún hafi skorið sig verulega frá þeim. Á myndinni er nýkomna rauðsprettan við hlið ósköp venjulegrar rauðsprettu, sem reyndar sést ekki vel því hún fellur svo vel að bakgrunninum. Við höfum áður verið með rauðsprettur sem voru nánast hvítar, en enga sem líkist þessari. Það er gaman þegar sjómenn eru vakandi fyrir óvenjulegum fiskum og hafa fyrir því að færa okkur.

Haftyrðlar frá Svalbarða

09.02.2018

Óvenju margir haftyrðlar fundust á götum bæjarins núna í desember og janúar. Þeir eru mjög smávaxnir og hrekjast stundum undan vindi í hvassviðrum og jafnvel langt inn í land. Við fréttum af hópi haftyrðla sem héldu sig á sjónum austan við Heimaey og voru fuglarnir sem voru að finnast í bænum að öllum líkindum úr þessum hópi. Einn af haftyrðlunum sem fannst var með senditæki fest á sig. Við eftirgrennslan kom í ljós að það hafði verið fest á fuglinn s.l. sumar á Svalbarða. Við getum því ályktað að hópurinn austan við Eyjar sé þaðan. Þetta er nokkur langur vegur fyrir svo litla fugla.

Annar haftyrðill

08.01.2018

Í dag var komið með annan haftyrðil til okkar. Fyrir jól var hópur haftyrðla á sjónum autan við Eyjar og einhverjir þeirra hröktust líklega undan vindi og fundust á götum bæjarins. Komið var með flesta þeirra til okkar í Sæheima.

Haftyrðlar eru mjög viðkvæmir og gengur illa að halda þeim lifandi, sérstaklega vegna þess að helsta fæða þeirra eru smá krabbadýr í svifi og því vandasamt að finna rétta fæðu handa þeim. Einnig virðast þeir verða mjög stressaðir að vera í haldi. Það er því allra best fyrir þá að komast til sjávar sem allra fyrst. Á myndinni er Aron Smárason sem fann haftyrðilinn og fór hann með hann út á Hamar til að sleppa honum.

Haftyrðill

05.01.2018

Þessar systur fundu haftyrðil á Heiðarveginum, sem náði ekki að hefja sig til flugs. Þær komu með hann í Sæheima og fóru þaðan beint út í Höfðavík til að sleppa honum. Haftyrðlar eru mjög viðkvæmir og því er alltaf best að sleppa þeim við fyrsta tækifæri. Stelpurnar heita Hulda Brá, Heiða Lára og Unnur Þórdís.

Teisturnar í jólabaði

21.12.2017

Í nóvember var komið með tvær mikið olíublautar teistur til okkar í Sæheima. Voru þær hreinsaðar fljótlega eftir komuna á safnið. Eftir það voru þær látnar synda reglulega, en urðu alltaf mjög blautar og því ekki hægt að sleppa þeim. Það er afar mikilvægt fyrir sjófugla að geta haldið vatni frá líkamanum annnars er dauðinn vís.

Þó að teistur séu af svartfuglaætt eins og lundar, þá eru þær að hegða sér að mörgu leyti ólíkt lundunum, sem eru á safninu hjá okkur. Ef við setjum tvo ókunna lunda saman þá ráðast þeir oftast hvor á annann og þarf því að halda þeim aðskildum. En þegar teisturnar voru settar saman þá virtust þær vera ánægðar að hittast og fóru fljótlega að kúra saman. Þær eru nú orðnar hinir bestu vinir og spjalla gjarnan saman með lágværu tísti. 

Það er búið að vera gaman að kynnast þessum skemmtilegu og ljúfu fuglum en við vonumst þó til að koma þeim út í náttúra aftur sem allra fyrst. Í gær voru þær oru báðar hreinsaðar á ný og vonandi dugar það til.

Fleiri haftyrðlar

19.12.2017

Í dag var komið með tvo haftyrðla til viðbótar til okkar í Sæheimum. Við höfum frétt af hópi haftyrðla sem halda sig rétt austan við Ystaklett og þeir sem ferðast með Herjólfi geta jafnvel komið auga á þá á sjónum.  

Haftyrðlar á ferð

17.12.2017

Í dag var komið með tvo haftyrðla til okkar í Sæheima, sem höfðu fundist í bænum. 

Haftyrðlar eru hánorrænir fuglar, sem verpa ekki hér, en halda sig gjarnan á sjónum við suðurströndina yfir vetrartímann. Þeir eru af svartfuglaætt og eru þeir lang minnstir svartfugla. Þeir eru um 150 grömm að þyngd, en til samanburðar er lundi um 500 grömm. Stundum gerist það í hvassviðrum að haftyrðlar hrekjast undan vindi upp á land og hafa jafnvel fundist langt inn í landi. 

Haftyrðlarnir tveir sem komið var með til okkar voru sprækir og vel haldnir og því var ákveðið að sleppa þeim samdægurs. Voru þeir frelsinu fegnir og flugu langt á haf út. Á myndinni má sjá Guðrúnu Ósk Jóhannesdóttur starfsmann Sæheima með annan haftyrðilinn.

Síðbúnar sjósvölur

01.12.2017

Ungar sjósvölu og stormsvölu fljúga stundum að ljósunum í bænum, líkt og lundapysjur. Þær eru yfirleitt seinna á ferðinni en pysjurnar, en nú í vikunni var bæði komið með stormsvölu og sæsvölu til okkar í Sæheimum Þær eru auðvitað mjög seint á ferðinni og stormsvalan var meira að segja ennþá aðeins dúnuð. 

Stormsvalan er minnsti sjófugl Evrópu og svalan sem komið var með til okkar var aðeins 28 grömm. Það var Sóldís Sif Kjartansdóttir sem fann stormsvöluna þegar hún var að heimsækja ömmu sína á Búastaðabrautinni. Eiga svölurnar báðar langt ferðalag fyrir höndum, en þær fljúga til Suður Atlantshafs á haustin.

Starfsmenn Náttúrustofu Suðurlands merktu báðar svölurnar.

Fálkinn frjáls

28.11.2017

Þann 9. nóvember s.l. var komið með fálka til okkar, sem var með óhreinindi í fiðrinu og þurfti hreinsunar við. Reyndist þetta vera förufálki, sem er sjaldséður flækingur hér á landi og er nokkuð minni en okkar íslenski fálki. Var fálkinn látinn jafna sig í nokkra daga og fékk vel að éta áður en hann var hreinsaður.

Í dag var farið með fálkann út á Breiðabakka og honum gefið frelsi. Það var Krisján Egilsson, sem sleppti honum, en hann hefur haft veg og vanda af umönnun fálkans meðan hann dvaldi hjá okkur í Sæheimum. 

Litarafbrigði af karfa

25.11.2017

Karfinn á myndinni kom um borð í Drangavík VE, þar sem þeir voru á karfaveiðum úti á Boða. Skiljanlega þá skar hann sig frá hinum körfunum þar sem hann var grár á litinn innan um hóp af hinum hefðbundnu rauðu körfum. Áhöfnin tók karfann og setti í frysti og færðu síðan fiskasafninu að gjöf. Það er alltaf gaman að fá óvenjulega fiska, hvort sem það eru nýjar tegundir eða litarafbrigði.

Starfskynning

23.11.2017

Elísa Hallgrímsdóttir nemandi í 10 bekk GRV var í starfskynningu hjá okkur í Sæheimum í dag. Hefur hún oft rétt okkur hjálparhönd í gegn um tíðina og er því vön ýmsum verkefnum á safninu. Því fékk hún alvöru viðfangsefni í dag, en það var að aðstoða við að hreinsa olíublauta æðarkollu, sem komið var með til okkar fyrir nokkrum dögum.

Elísa er vön að umgangast fuglana á safninu og því var hún ekki smeyk við æðarkolluna, þrátt fyrir stærðina og hamaganginn í henni. Fékk hún að hreinsa höfuð kollunnar, en til þess verks notum við gjarnan mjúka tannbursta og eyrnapinna. Hreinsun kollunnar gekk vel og nú er hún í þurrkun undir hitalampa. Þökkum við Elísu fyrir hjálpina í dag og vonum að hún hafi lært eitthvað nýtt.

Fagurserkur

23.11.2017

Eins og við greindum frá, þá færði áhöfnin á Dala- Rafni okkur í Sæheimum tvo óvenjulega fiska að gjöf. Annar þeirra var búrfisksbróðir en hinn var af tegund sem nefnist fagurserkur. Veiddust þeir báðir á Skerjadýpi í ágúst s.l. 

Fagurserkur er mun algengari hér við land en búrfisksbróðir. Hann veiddist fyrst hér við land árið 1960, suðvestur af Vestmannaeyjum. Síðan hefur hann veiðst æ oftar og frá árinu 1989 hefur hann veiðst nánast árlega. Þeir fiskar sem hafa verið að veiðast hafa verið 23-50 cm langir og fagurserkurinn sem Dala Rafn kom með að landi var 39 cm. Geta þeir orðið allt að 70 cm langir. 

Heimkynni fagurserks eru í austanverðu Atlantshafi frá Kanaríeyjum að Íslandi og að vestanverðu frá Mexíkóflóa að Maine. Einnig finnst hann við Japan, Ástralíu, Nýja Sjáland og Chile. Fagurserkur er botn- og djúpfiskur, sem er hér við land algengastur á 400-800 metra dýpi, en hefur veiðst allt niður á 1300 metra dýpi. Helsta fæða fagurserks eru fiskar, krabbadýr og smokkfiskar.

Heimild: Íslenskir fiskar (2013) eftir Gunnar Jínsson og Jónbjörn Pálsson, með teikningum eftir Jón Baldur Hlíðberg. 

Búrfisksbróðir

23.11.2017

Áhöfnin á Dala Rafni VE kom færandi hendi nú um daginn þegar þeir færðu safninu tvo óvenjulega fiska fiska sem alla jafna veiðast ekki hér við Íslandsstrendur. Var þeim hugsað til fiskasafnins og settu þá í frysti og færðu okkur síðan að gjöf.

Erum við mjög ánægð með þegar sjómenn hugsa fyrir því að færa safninu óvenjulega fiska. Ekki aðeins kemur það sér vel fyrir safnið, heldur er það einnig áhugavert fyrir sjómennina sjálfa að vita hvaða óvenjulegu fiskar eru að koma í veiðarfærin og auk þess er mikilvægt fyrir Hafrannsóknastofnun að fá upplýsingar um þessa fisktegundir.

Fengum við Val Bogason hjá útibúi Hafrannsóknastofnunarinnar í Vestmannaeyjum til að hjálpa okkur við greiningu fiskanna. Annar fiskanna reyndist vera búrfisksbróðir sem er flækingur hér við land. Heimkynni hans í austanverðu Atlantshafi eru frá Grænhöfðaeyjum og Asóreyjum að Bretlandseyjum. Hann finnst þó mun víðar. Er þetta miðsævis- og djúpfiskur sem veiðst hefur á 100-1200 metra dýpi og lifir á ýmsum smáfiskum og  krabbadýrum eins og ljósátu t.d. 

Fyrsti búrfisksbróðirinn við Ísland veiddist árið 1964 djúpt undan Suðvesturlandi. Samkvæmt bókinni "Íslenskir fiskar" þá er þetta fjórði búrfisksbróðirinn sem veiðst hefur við landið.

Heimild: Íslenskir fiskar (2013) eftir Gunnar Jónsson og Jónbjörn Pálsson, með teikningum Jóns Baldurs Hlíðberg.