Fréttir

Þúfutittlingi bjargað

05.09.2014

Tvær stelpur komu á safnið með þúfutittling sem flogið hafði á rúðu og var vankaður. Ákveðið var að hafa hann til athugunar í nokkra klukkutíma og sjá hvort  hann myndi ekki jafna sig. Hann gerði það svo um munaði og náði að fljúga upp úr kassanum sínum. Hann flögraði um skrifstofuna með starfsmenn safsnins á eftir sér. Að lokum náðist að handsama fuglinn og var honum sleppt næsta garði. Hann flaug hinn hressasti á vit frelsisins. 

Talar við lunda

29.08.2014

Þessi drengur heitir Gustav Baldur og býr nálægt Frankfurt í Þýskalandi. Hann er aðeins sjö ára gamall en hefur þó komið átta sinnum til Vestmannaeyja með forleldrum sínum. Fjölskyldan hefur búið hjá Ruth Zholen meðan á dvölinni stendur og hefur hún kennt Gustav að tala lundamál. Í öll skiptin hafa þau komið í heimsókn á Fiskasafnið og hefur hann spjallað við Tóta. Auðvitað fannst Tóta þetta mjög spennandi og ekki skemmdi fyrir að strákurinn var í einstaklega flottri peysu sem prjónuð var fyrir hann eftir síðustu heimsókn til Eyja.

 

 

Þrjú ár frá komu Tóta

29.08.2014

Í dag eru þrjú ár frá því að komið var með Tóta á safnið. Þá var hann aðeins pínulítill dúnhnoðri og var aðeins 95 grömm að þyngd. 

Um þetta leyti eru lundapysjurnar venjulega að yfirgefa holurnar og eru tilbúnar til að bjarga sér á eigin spýtur. Þær eru þá um 250 til 300 grömm.

Það var Ágústa Georgsdóttir sem kom með hann til okkar og hér er hún með Tóta ásamt vinkonum þeirra beggja þeim Jóhönnu og Elísu.

Nýstárleg veiðiaðferð

29.08.2014

Við á Sæheimum - Fiskasafni erum svo heppin að á hverju sumri eru hér nokkrir hjálparkokkar sem aðstoða okkur við ýmis störf. Einn af þeim er hann Tobbi, sem er mikill veiðimaður. Þegar lagðar voru gildrur við Ræningjatanga fyrr í vikunni kom hann auga á ígulker ofan í sjónum og teygði sig eftir því. Ekki voru handleggirnir alveg nægilega langir og því brá hann á það ráð að fara úr skónum og náði að veiða ígulkerið í annan skóinn sinn. Hér á myndinni sést hann með nýja veiðarfærið og aflann.

Feiminn kambhríslungur

28.08.2014

Kambhríslungurinn sem komið var með á safnið í síðustu viku virðist vera alveg sérstaklega feiminn og hefur ekki mikið verið að sýna sig. Hann gerði þó undantekningu í dag og stillti sér upp fyrir ljósmyndara. Vonandi gerir hann meira af þessu því þetta er virkilega flottur og sérstakur fiskur. Eiginlega engum líkur. Hann hefur mest haldið sig ofan í eldfjallinu og er því líklega eini kambhríslungurinn sem býr í eldfjalli. 

Komin önnur pysja

28.08.2014

Nú er komin önnur lundapysja í pysjueftirlitið 2014. Fannst hún við golfskálann og var spipuð að stærð og pysjan sem fannst í gær, eða 286 grömm og vænglengdin 145 mm. Vonandi verða pysjurnar sem eiga eftir að koma svona flottar. 

Fyrsta lundapysjan

27.08.2014

Fyrsta pysjan hefur nú skilað sér í pysjueftirlit Sæheima. Fannst hún niður fið FES í nótt. Reyndist hún vera fullgerð og því tilbúin til að fara til sjávar. Í pysjueftirlitinu eru pysjurnar vigtaðar og vængmældar og reyndist þessi pysja vera 288 grömm að þyngd og vænglengdin 145 millimetrar. Hún er því talsvert yfir meðalþyngd pysjanna  sem hafa komið síðustu ár. Það voru þau Andrea og Ólafur Már Gunnlaugsbörn sem komu með pysjuna á safnið og voru þau á leið út í Klauf til að sleppa henni.

Tóti þriggja ára

20.08.2014

Lundinn okkar, hann Tóti, kom til okkar á safnið í lok ágúst 2011 og var þá um viku gamall. Hann er því þriggja ára um þessar mundir. Haldið var upp á afmælið hans í dag þó að ekki sé víst að þetta sé alveg rétti dagurinn. Nokkrir krakkar sungu fyrir hann afmælissönginn og boðið var upp á afmælistertu sem var skreytt með þremur kertum. Tóti sýndi tertunni ekki mikinn áhuga en sporðrenndi loðnu sem honum var boðin.

Kambhríslungur

19.08.2014

Starfsmenn Sæheima leggja stundum krabbagildrur í Klaufinni eða við Ræningjatanga. Þeirra er vitjað eftir sólarhring og samanstendur aflinn þá oftast af bogkröbbum, sprettfiskum og einstaka marhnút. Það bar vel í veiði núna á dögunum þegar vænn kambhríslungur fannst í gildrunni. Slíkur fiskur hefur ekki borist safninu síðan fyrir gos þegar tveir ungir strákar fundu einn slíkann á Urðunum og færðu safninu að gjöf. Lifði hann í mörg ár.

Heimsókn frá New York Aquarium

15.08.2014

Þessar hressu konur komu í heimsókn á Fiskasafnið nú á dögunum. Þær eru frá Fiskasafninu í New York og fannst mjög gaman að skoða safnið en þó sérstaklega að hitta Tóta, sem skrúfaði frá sjarmanum og heillaði þær alveg upp úr skónum.  

Feitur fýll

12.08.2014

Þann 18. júlí komu ferðamenn með lítinn fýlsunga á safnið, sem þeir höfðu bjargað úr hundskjafti. Fýlsunginn reyndist ekki vera slasaður og tók við æti frá starfsmönnum safnsins þegar hann hafði jafnað sig á mesta áfallinu. Síðan þá hefur hann verið alveg botnlaus og kallar sífellt eftir æti. Það virðist bera tilætlaðan árangur því að hann hefur þrefaldað þyngd sína á þessum vikum. Nú er hann rétt tæp 800 grömm en var aðeins um 250 grömm við komuna á safnið. Verður honum sleppt þegar hann verður tilbúinn til að bjarga sér sjálfur.

Sæsteinsuga

08.08.2014

Georg á Blíðu VE færði safninu sæsteinsugu sem hafði komið með aflanum. Hafði hún sogið sig fasta við löngu.

Sæsteinsugur eru afar sérkennilegir fiskar og lifa sem sníkjudýr á öðrum fiskum og sjúga úr þeim blóð. Kjaftur þeirra er hringlaga og með fjölda tanna sem koma sér vel þegar þær festa sig á fórnarlömbum sínum. 

Æðarungi

13.07.2014

Þessum litla æðarunga var bjargað úr klóm kattar og komið með hann á safnið. Hann reyndist vera óskaddaður eftir viðskiptin við köttinn. Því var ákveðið að sleppa honum eftir að hann hafði fengið smá matarbita í gogginn. Farið var með hann á tjörnina inni í dal og slóst hann þar í hóp annarra æðarunga eftir nokkrar tilraunir hans til að fara aftur til bjargvættar síns.

Rituungar

10.07.2014

Síðustu daga hefur verið komið með nokkuð af rituungum á safnið. Þeir eru að finnast undir bjarginu við Skiphella og hafa dottið niður af sillum sínum eða verið hrint framaf af eldri systkynum. Þeir eu í misjöfnu ástandi en flestir hafa þeir tekið vel til matar síns og dafna ágætlega. Þeim verður síðan sleppt þegar þeir eru orðnir fleygir og geta bjargað sér á eigin spýtur.  

 

Fylgið mér í Sæheima

04.07.2014

Búið er að varða leiðina frá upplýsingamiðstöð ferðamanna í Eymundsson að helstu áfangastöðum ferðamanna í bænum. Það er gert þannig að máluð eru lýsandi merki á gangstéttarhellur sem leiða ferðamennina áfram. Þetta er mjög gott framtak og hjálpar vonandi ferðamönnum að rata um eyjuna okkar. Á myndinni má sjá merkið sem leiða skal ferðamenn að Sæheimum fiskasafni.

Safnalykill 2014

04.07.2014

Sagnheimar og Sæheimar bjóða nú upp á Safnalykil. Lykillinn kostar aðeins 1.500 krónur á mann og gildir sem aðgangur fyrir einn mann á bæði söfnin. Hægt er að nálgast lyklana í afgreiðslu safnanna. 

Frítt er fyrir börn 17 ára og yngri. 

Peyjar í heimsókn

27.06.2014

Þessa dagana stendur yfir Shellmótið í fótbolta og koma peyjarnir í hópum í heimsóknir til okkar á Fiskasafnið. Það er alltaf mikið fjör á safninu þessa daga og eru Shellmótspeyjarnir í miklu uppáhaldi hjá Tóta lunda sem er sjálfur í ÍBV og ætlar að vera með á mótinu þegar hann er orðinn nógu gamall.

Tóti stígur í vænginn

19.06.2014

Þessi spænska blómarós kom í heimsókn á safnið og Tóti heillaði hana upp úr skónum eins og flestar aðrar. Hafði hún komið til landsins til að dansa í flamencosýningu og ákvað að skreppa úr í Eyjar. Tóti var auðvitað alsæll í fanginu á henni en var ekki tilbúinn til að stíga skrefið til fulls og flytja með henni til Spánar.

Pæjurnar mættar

11.06.2014

Þessa dagana fer fram hið árlega TM fótboltamót í 5 flokki stúlkna eða pæjumótið svokallaða.

Stelpurnar eru auðvitað duglega að heimsækja Fiskasafnið og fyrsti hópurinn lét sjá sig í dag. Það voru stelpurnar í Fjölni sem voru hinar hressustu og upplýstu okkur jafnframt um að þær væru með besta liðið.

Það er alltaf fjör á safninu meðan fótboltamót yngri flokka fara fram og gaman að fá þessa hressu krakka í heimsókn.

Afmæli

04.06.2014

Um síðustu helgi var haldið upp á 50 ára afmæli Fiskasafnsins. Okkur fannst vera vel við hæfi að halda upp á þessi tímamót um sjómannadagshelgina enda hefur alltaf verið mjög góð samvinna milli safnsins og sjómanna í Vestmannaeyjum. Vikuna fyrir afmæli komu t.d. áhafnir Gullbergsins, Þórunnar Sveins og Drangavíkur með fjölda lifandi fiska fyrir safnið.

Nemendur í Grunnskóla Vestmannaeyja unnu listaverk fyrir safnið á þemadögum skólans og var safnið skreytt í hólf og gólf með þessum glæsilegu listaverkum.

Upphaflega var hugmyndin að nota planið sunnan við safnið fyrir veisluhöldin en þar sem spáði rigningu þessa helgi fengum við að flytja veisluna niður á Slökkvistöðina, sem er hér á neðri hæðinni.

Boðið var upp á kökur og kaffi og skemmtiatriði sem börn á ýmsum aldri sáu um. Krakkarnir í 4. bekk sýndu dans við skemmtilegt sumarlag, krakkarnir í 5 ára deildinni sungu fiskalag sem þau hafa verið að æfa og þær Erna Scheving og Birta Birgisdóttir úr 8. bekk fluttu nokkur lög.

Seinna um daginn varð þetta aðeins meira fullorðins, en þá flutti bæjarstjóri stutta tölu og sýnd var kvikmynd eftir Gísla Óskarsson um náttúrufar og sögu Löngunnar.

Alls komu um 600 manns í heimsókn á safnið þessa helgi.