Fréttir

Langvían komin aftur

08.04.2015

Langvían sem við slepptum á Páskadag er komin á safnið til okkar aftur. Starfsmenn Rib-Safari rákust á hana við smábátahöfnina og kvartaði hún þá sáran og nánast bað um að verða bjargað. Á myndinni má sjá þar sem hún rekur raunir sínar fyrir Kristjáni Egilssyni, sem kom með hana á safnið. Hún tók vel til matar síns og virtist vera alsæl yfir því að vera komin til okkar aftur. Eigum við því frekar að venjast að þessu sé öfugt farið.

Langvíu sleppt

05.04.2015

Fyrir nokkrum vikum var komið með langvíu á safnið sem hafði fundist í fjörunni í Höfðavík. Þegar hún fannst var hún mjög veikburða og var svartbakur farinn að hugsa sér gott til glóðarinnar að bragða á gómsætri langvíu. Starfsmaður Náttúrustofu Suðurlands gerði þessar áætlanir svartbaksins að engu og bjargaði langvíunni úr klóm hans.

Þegar á safnið var komið var reynt að koma æti ofan í langvíuna og hressist hún mjög eftir að hafa étið nokkrar loðnur. Hefur hún verið í góðu yfirlæti á safninu og sporðrenndi mörgum loðnum á dag. Var hún orðin nægilega hress til að fá frelsi á ný og halda gráðugum svartbökum í hæfilegri fjarlægð.

Heimsókn

11.03.2015

Þessi fjölskylda, sem býr í Miami í Flórida, kom í heimsókn á safnið í dag. Það væri nú ekki í frásögur færandi nema vegna þess að þau komu til Vestmannaeyja eingöngu til að heimsækja lundann Tóta. Á ferð þeirra um Suðurland varð einhver á vegi þeirra sem sagði þeim frá því að í Sæheimum væri lifandi lundi. Þau urðu mjög spennt og drifu sig í Þorlákshöfn þar sem þau tóku fyrri ferð Herjólfs  til Vestmannaeyja og fara síðan til baka í fyrramálið. 

Gaddakrabbi frá Gullberginu

04.02.2015

Áhöfnin á Gullbergi VE færði Sæheimum flottan gaddakrabba í dag. Það var Emma Ey Sigfúsdóttir sem kom með krabbann til okkar. Það má segja að krabbinn hafi átt viðburðaríkan dag því hann kom við á leikskólanum Kirkjugerði og í grunnskólanum á leið sinni á safnið. Nú er hann að eignast nýja vini því að fyrir eru tveir gaddakrabbar á safninu.

Lundi í vetrarbúningi

02.02.2015

Áhöfnin á Þórunni Sveinsdóttur VE kom með þennan lunda á safnið. Hafði hann komið um borð hjá þeim og greinilega eitthvað slappur. Hann er eitthvað laskaður á væng en virðist þó ekki vera brotinn. Lundinn er frekar léttur og hefur mögulega átt erfitt með að veiða sér til matar í einhvern tíma. Hann virðist að öðru leyti vera mjög hress og tekur vel til matar síns.

Það er ekki oft sem við sjáum lunda í vetrarbúningi enda halda þeir sig á sjónum allan veturinn. Þegar þeir koma að landi á vorin eru þeir komnir í varpbúning sinn, sem er sá búningur sem við þekkjum.

Skipt um glugga

30.01.2015

Nú er verið að skipta um glugga í húsnæði Sæheima. Fyrir áramót var skipt um alla glugga í rýminu bakatil á safninu en nú í janúar er skipt um glugga á skrifstofu, afgeiðslu, fuglasal og steinasafni. Það eru þeir Einar Birgir og Brynjar sem sjá um vinnuna og eru þeir nú að leggja lokahönd á verkið. 

Þrettándinn

09.01.2015

Þrettándinn verður haldinn hátíðlegur nú um helgina. Þegar búið er að kveðja álfa, tröll og jólasveina er tilvalið að bregða sér í Sæheima og kíkja á dýrin þar. Þau eru öll ennþá í jólaskapi og sömuleiðis starfsfólkið eins og sjá má á þessari mynd.

Opið verður á safninu bæði laugardag (10/1) og sunnudag (11/1) klukkan 13 til 16 og verður ókeypis aðgangur inn á safnið þessa daga.

Jólakveðja

23.12.2014

Fuglarnir á safninu láta sér fátt um finnast þó að nú séu að koma jól og mannfólkið eitthvað að stressast og stússast. Þeir senda þó öllum sínar bestu jólakveðjur. Einnig óskar starfsfólk Sæheima gestum og velunnurum safnsins gleðilegra jóla og þökkum fyrir gjafir og heimsóknir á árinu. Sjáum ykkur vonandi sem flest aftur á nýja árinu.

Heimsókn frá Montreal

26.11.2014

Sæheimar -Fiskasafn fengu skemmtilega heimsókn frá Biodome safninu í Montreal í Kanada. Þetta er mjög stórt safn á sviði náttúrufræða og spanna sýningar þess allt frá skordýrum til himintunglanna. Safnið er til húsa í höllinni sem byggð var fyrir Ólimpíuleikana 1976. Gestir safnsin geta gengið í gegn um nokkrar tegundir vistkerfa allt frá regnskógum að pólsvæðunum. Þetta er glæsilegt safn sem gaman væri að heimsækja.

Það er gaman að segja frá því að Biodome óskar eftir samstarfi við Sæheima vegna sýningar þeirra á lífríki Norður Atlantshafsins. Það er mikill fengur fyrir okkur að komast í kynni við starfsfólk safnsins og getum við örugglega lært mikið af þeim.

Það má skoða safnið á slóðinni www. espacepourlavie.ca/en/biodome

 

Skólahópar í heimsókn

21.11.2014

Nú undanfarið hafa skólakrakkar í Grunnskóla og FramhaldsskólaVestmannaeyja komið í heimsóknir í Sæheima Fiskasafn. Eldri krakkarnir fá verkefni sem þau vinna á safninu en þau yngri fá tækifæri til að skoða safnið á sinn hátt, þó að þau skoði sérstaklega þann fugl og fisk sem þau eiga að læra um hverju sinni. Í dag komu krakkarnir í fyrsta og öðrum bekk í Grunskólanum. Það er alltaf skemmtilegt að fá þessa hressu og áhugasömu krakka í heimsókn.

Blóm á Heimaey

02.11.2014

Mjög blómlegt hefur verið í Sæheimum um Safnahelgina, en þar hafa verið til sýnis ljósmyndir af ýmsum blómplöntum sem finnast á Heimaey. Ákveðið hefur verið að sýningin muni standa áfram í nokkrar vikur. Nú hefur hefðbundin vetraropnun tekið gildi og er safnið einungis opið á laugardögum kl.13-16 eða eftir samkomulagi.

Ljósmyndir á húsgöflum

01.11.2014

Núna um Safnahelgina verður varpað upp ljósmyndum á tvo húsgafla í bænum. Annars vegar er það norðurgafl Sýslumannshússins þar sem fjöldi ljósmynda frá Sæheimum - Fiskasafni eru sýndar. Þar er um að ræða myndir af fuglum, fiskum o.fl. lífverum sem verið hafa á safninu. Hins vegar er það vesturgafl Saltfiskhússins og þar eru sýndar ljósmyndir frá Gísla Friðriki Johnsen sem hann tók á fyrri hluta síðustu aldar. Myndirnar verða sýndar  á kvöldin yfir Safnahelgina. Við þökkum íbúum húsanna að Heiðarvegi 13 og Nýborg fyrir að leyfa okkur að koma fyrir skjávörpum hjá þeim. Einnig eru þakkir til Menningaráðs Suðurlands sem veitti styrk til sýningarinnar.

Safnahelgin framundan.

29.10.2014

Safnahelgi Suðurlands verður haldin í sjöunda sinn um næstu helgi eða frá fimmtudeginum 30. október og til sunnudagsins 2. nóvember. Margt verður í boði þessa helgi víðs vegar um Suðurland (sjá nánar á slóðinni www.sudurland.is).

Í Sæheimum verður ljósmyndasýning af blómplöntum sem finnast á Heimaey. Ljósmyndirnar voru upphaflega teknar í tengslum við verkefni sem var unnið fyrir heimasíðu Sæheima. Þar verður hægt að skoða kort af Heimaey og skoða ljósmyndir af helstu blómplöntum sem vaxa á ýmsum svæðum eyjarinnar. Þessi hluti verkefninsins hlaut styrk frá Safnaráði. Það er svo Menningarráð Suðurlands sem veitir safninu styrk til að setja upp sýningu á þessum ljósmyndum.

Sýningin verður opin laugardaginn 1. nóvember og sunnudaginn 2. nóvember kl. 13-16.

Tóti & Tóti

20.10.2014

Þórarinn Ingi Valdimarsson kom og heimsótti nafna sinn á fiskasafninu nú á dögunum. Lundinn á safninu var nefndur í höfuðið á Þórarni Inga eða Tóta eins og hann er oftast kallaður. Lundinn var um viku gamall þegar komið var með hann á safnið og var því aðeins pínulítill dúnhnoðri. En ástæðan fyrir því að þessi litli hnoðri fékk þetta stóra nafn er sú að daginn sem hann kom á safnið stóð yfir leikur hjá ÍBV og þar skoraði Þórarinn Ingi sigurmarkið. Einn af starfsmönnum safnsins var mjög spenntur yfir leiknum og nefndi hnoðrann hið snarasta. 

Eins og sést á myndinni sem Örn Hilmisson tók af þeim þá fór vel á með þeim félögum.

Lokatölur í pysjueftirlitinu 2014

06.10.2014

Alls komu 99 pysjur í pysjueftirlit Sæheima árið 2014. Þó að pysjurnar hafi verið þrisvar sinnum fleiri en í fyrra þá er þetta langt því frá að vera gott pysjuár. Fólk sem fór í pysjuleiðangra meðan allt lék í lyndi man eftir því að hver krakki var að finna svona margar pysjur yfir tímabilið og þeir allra hörðustu fundu slíkan fjölda bara á einni helgi.

Meðalþyngd pysjanni var nokkuð góð eða 260 grömm sem er talsvert hærra en undanfarin ár. Það má því segja að í ár hafi verið fáar pysjur en nokkuð góðar. Rannsóknir sýna að þungar pysjur sem eru snemma á ferðinni hafa mun meiri líkur á að lifa af fyrsta veturinn en pysjur sem eru litlar og seint á ferðini. Við erum því vongóð um að pysjurnar í ár snúi til baka á varpstöðvarnar þegar þær hafa aldur til.

Dýralæknir til hjálpar

27.09.2014

Nú á dögunum var komið með lundapysju á safnið sem reyndist slösuð og því ekki hægt að sleppa henni til sjávar. Annar fótur hennar virtist vera alveg máttlaus og gat hún því hvorki staðið, gengið né synt. Fóturinn virtist þó ekki vera brotinn og pysjan tók vel við æti og því töldum við að hún ætti nokkuð góða möguleika á að hressast. Við vorum svo heppin í dag að einn af gestum safnsins var dýralæknir sem skoðaði fót pysjunnar. Hún staðfesti að fóturinn væri ekki brotinn og ekki heldur úr lið. Einnig sagði hún að taugar virtust óskaddaðar og blóðstreymi í fótinn virtist eðlilegt. Hún sýndi okkur æfingar fyrir pysjuna sem munu styrkja vöðvana í fætinum. Pysjan mun því verða áfram á safninu og fer daglega í sjúkraþjálfun og sundleikfimi. Þessi góðhjartaði dýralæknir heitir Karen og er frá Pennsylvaníu í Bandaríkjunum. Hún fær bestu þakkir frá okkur.

Kolkrabbi

24.09.2014

Áhöfnin á Gullbergi VE færði safninu þennan flotta kolkrabba að gjöf þegar þeir komu að landi í morgun. Kolkrabbar halda sig jafnan í holum sem þeir finna og eru ekki mikið að sýna sig. Þessi leyfði þó að teknar væru nokkrar nokkrar ljósmyndir áður en hann faldi sig.

Fýllinn floginn

23.09.2014

Um miðjan júlí komu ferðamenn með lítinn fýlsunga á safnið sem þeir björguðu úr hundskjafti. Hann var ósköp lítill og aumur og þótti okkur hann ekki vera líklegur til að lifa. Hann tók þó fljótlega æti og stækkaði og fitnaði heil ósköp næstu vikurnar. Hann virtist skynja að við vorum ekki óvinir heldur bjargvættir og reyndi hann aldrei að æla á fólk eins og fýla er siður. Hann var einstaklega ljúfur og skemmtilegur fugl og varð hann hændur að fólki og var í miklu uppáhaldi hjá bæði gestum og starfsfólki safnsins. 

Fýlnum var gefið frelsi í dag og var farið með hann út á Eiði þar sem fjöldi fýla heldur sig jafnan enda nægt æti að hafa. Hann virtist vera alveg tilbúinn til að halda út á hafið og tók flugið eftir að hafa sest aðeins á sjóinn. Hafði hann farið á nokkrar sundæfingar á safninu og var því nokkuð öruggur með sig á sjónum. Það var nokkur eftirsjá hjá starfsfólkinu enda skemmtilegur fugl þarna á ferðinni.

Pysjur enn að finnast

21.09.2014

Einstaka pysjur eru enn að finnast í bænum. Þessir feðgar komu með pysju númer 98 í pysjueftirlitinu en hún fannst við Vinnslustöðina í nótt sem leið.

Opnunartími í september

15.09.2014

Nú í september verður aukinn opnunartími á safninu. Alla jafna hefst vetraropnunartími um miðjan mánuðinn en nú verður opið alla daga til loka september frá klukkan 13 til klukkan 17.