News

Toppari

08.09.2016

Ein af pysjunum sem komið var með í pysjueftirlit Sæheima í dag var svokallaður toppari. Hann hafði hvítan fjaðraskúf upp úr höfðinu en var að öðru leyti eins og venjuleg pysja. Á safninu er til uppstoppaður toppari sem fannst fyrir mörgum árum. Hann hefur einnig hvítan fjaðraskúf á höfðinu. Topparar eru afar sjaldgæfir en vonandi nær þessi að auka kyn sitt verulega.

302 pysjur í dag

08.09.2016

Nú eru komnar samtals 1125 pysjur í pysjueftirlitið og hefur þeim fjölgað dag frá degi. Í gær voru þær 233 talsins og í dag voru vigtaðar 302 pysjur. Það er því spennandi að vita hvað þær verða margar á morgun og næstu daga. Pysjurnar hafa flestar verið mjög góðar og aðeins örfáar sem hefur þurft að ala í nokkra daga sökum þess hve smáar þær eru. Það voru þau Georg og Sunna sem komu með þúsundustu pysjuna 

Komnar 600 pysjur

07.09.2016

Þeir félagar Auðunn og Hafsteinn komu rétt í þessu með sexhunduðustu pysjuna í pysjueftirlit Sæheima. Pysjan fannst upp við Eldfell og var 164 grömm að þyngd.

Enn fleiri pysjur

05.09.2016

Í dag var komið með 125 pysjur í pysjueftirlitið og er því heildarfjöldinn kominn upp í 424 pysjur. Það er gaman að segja frá því að þær eru flestar vel gerðar og tilbúnar til að halda á haf út. Aðeins er ein pysja í fóstri hjá okkur vegna þess hve létt hún er. En því miður eru líka nokkarar pysjur sem hafa lent í grút eða olíu og þarf að hreinsa áður en hægt er að sleppa þeim. Merktar voru um 50 pysjur í dag.

Á myndinni er hún Katla María, sem kom með þrjár stórar pysjur, sem voru allar um 300 grömm að þyngd. 

Komnar 300 pysjur

05.09.2016

Systurnar Katla og Jara komu með pysju til Sæheima í morgun og reyndist það vera pysja númer 300 í pysjueftirlitinu. Þær eru úr Kópavogi og voru á leið í Herjólf. Þær ætluðu að sleppa pysjunni þaðan. Fyrir utan safnið fengu þær gefins aðra pysju og geta því báðar sleppt pysjum á leiðinni.

Flottar pysjur

03.09.2016

Í dag komu alls 69 pysjur til skráningar í pysjueftirlitið og eru því pysjurnar orðnar 184 samtals. Þær eru langflestar í góðu ástandi og alveg tilbúnar til að fara í sjóinn. Meðalþyngd þeirra er um 261 gramm, sem er nokkuð betra en var í fyrra. Fjöldi pysja hefur aukist dag frá degi og vonandi heldur sú þróun áfram.

Pysjueftirlitið fer vel af stað

01.09.2016

Fyrsta pysjan kom í pysjueftirlit Sæheima þann 24. ágúst. Næstu daga á eftir komu einstaka pysjur, en æ fleiri síðustu dagana. Í gær komu 17 pysjur í eftirlitið og 27 pysjur í dag. Krakkarnir hafa verið dugleg að koma með pysjurnar til okkar í Sæheima og kunnum við þeim bestu þakkir fyrir enda er eftirlitið að gefa okkur mjög góðar upplýsingar um fjölda og ástand pysjanna ár hvert.

Pysjurnar hafa nánast allar verið vel gerðar og er meðalþyngd þeirra um 252 grömm. Það er mjög mikilvægt að sleppa þeim strax daginn eftir að þær finnast. Ef þeim er haldið lengur léttast þær hratt og verða slappar. Þær verða stressaðar í þessu nýja umhverfi sem pappakassinn er og setja oft mikla orku í að sleppa úr prísundinni. Sérstaklega ef það eru fleiri en ein pysja í kassanum. Best er að hafa aðeins eina pysju í hverjum kassa. Einnig er mjög mikilvægt að meðhöndla pysjurnar  ekki mikið því að við það geta þær misst olíuna úr fiðrinu sem er þeim svo mikilvæg til að halda vatni frá líkamanum. Pysjur sem er haldið lengi og mikið meðhöndlaðar eiga ekki mikla möguleika á að lifa.

Safnið verður opið frá kl. 10 til 17 alla daga út september. Þeir sem ekki ná að koma á þessum tíma geta líka viktað pysjurnar heima og sent okkur síðan upplýsingar um þyngd, dagsetningu og fundarstað með tölvupósti á margret@setur.is 

Hann á afmæli í dag !

20.08.2016

Við höldum upp á 5 ára afmæli Tóta lunda í dag. Við vitum ekki fyrir víst að þetta sé rétti dagurinn en hann er nálægt lagi. Tóti er auðvitað í sparifötum í tilefni dagsins og á matseðlinum verður loðna á rækjubeði að hætti Sæheima. Lundavinir Tóta á safninu eru mjög spenntir fyrir matarboðinu.

Pysjan þyngist vel

18.08.2016

Lundapysjan sem komið var með eftir flugeldasýninguna á Þjóðhátíð hefur þyngst mikið, enda mjög dugleg að éta. Hún sporðrennir nú heilu loðnunum og hefur varla kyngt þegar hún biður um meira. Hún var um 80 grömm við komuna á safnið en er nú um 190 grömm og hefur því gert gott betur en að tvöfalda þyngd sína. 

Kettlingur

10.08.2016

Nokkrir strákar voru staddir í Bessahrauni í gær þegar þeir heyrðu ámátlegt væl. Það reyndist koma frá litlum kettlingi á þaki eins hússins. Þeir leituðu bæði að læðunni og hugsanlegum eiganda kettlingsins en fundu ekki. Þá brugðu þeir á það ráð að koma með kettlinginn í Sæheima. Við vorum svo heppin að hjá okkur var staddur nemi í dýralækningum. Hún sagði kettlinginn það ungan að það allra besta fyrir hann væri að fá móðurmjólkina eða mjólk frá annari læðu. Því leitum við að heimili með mjólkandi læðu með 2-4 vikna gamla kettlinga. 

Dýralæknirinn gaf okkur uppskrift að mjólk fyrir litla kettlinga í stað móðurmjólkurinnar. Hann er nú á góðu heimili og fær mjólkina sína á þriggja tíma fresti. Þar fær hann einnig góðan skammt af klappi og knúsi. 

Lars og Heimir taka flugið

08.08.2016

Komið hefur verið með fjölda rituunga í Sæheima í sumar. Krakkarnir á safninu hafa hjálpað til við uppeldi unganna og gefið flestum þeirra nafn.Tveir af þeim fengu nöfnin Lars og Heimir. Þeir komu til okkar meðan Orkumótið stóð yfir og allir mjög spenntir yfir EM í knattspyrnu. Ungarnir hafa vaxið og dafnað hjá okkur í sumar og var þeim sleppt nú um helgina. 

 

Pínulítil lundapysja

03.08.2016

Um liðna helgi var komið með agnarsmáa lundapysju til starfsmanns Sæheima, sem var við innrukkun á Þjóðhátíð. Líklega hefur pysjan orðið skelfingu lostin vegna flugeldanna og því ákveðið að yfirgefa holuna sína. Hún er nú í góðu yfirlæti hjá okkur í Sæheimum og nærist vel.

Breyttur opnunartími yfir Þjóðhátíð

27.07.2016

Í Sæheimum verður opnunartíminn styttur meðan Þjóðhátíðin stendur yfir. Opið verður klukkan 13-15 föstudaginn 29. júlí til mánudagsins 1. ágúst. 

Góður endir

28.06.2016

Komið var með þennan litla tjaldsunga á safnið í gær. Hafði hann fundist við golfvöllinn og var orðinn mjög veikburða. Það tókst að koma í hann æti og hresstist hann við það svo um munaði. Í lok dagsins hljóp hann um tístandi í leit að foreldrunum. Finnendur ungans fóru með hann að þeim stað sem hann fannst og slepptu honum nálægt tjaldpari með unga. Hann tísti nokkrum sinnum og kom þá annað foreldrið hlaupandi og sótti hann en rak einnig bjargvættina í burtu. Síðast sást til ungans þar sem hann hljóp um með fjölskyldu sinni við geen fjögur á golfvellinum.

Lið Fjarðabyggðar kemur færandi hendi

23.06.2016

Í gær fengu Sæheimar - fiskasafn góða sendingu. Það voru ársgömul hrognkelsi frá Sindra Má Smárasyni á Fáskrúðsfirði. Lið Fjarðabyggðar á Orkumótinu gerði sér lítið fyrir og fluttu þau fyrir okkur alla leið til Vestmannaeyja. Þeir heimsóttu safnið í dag og þá gátum við þakkað þeim greiðann með því gefa þeim Sæheima derhúfur og buðum þeim í skoðunarferð í bakrými safnsins, þar sem þeir gátu heilsað upp á hrognkelsin, sem þeir fluttu.

Hrognkelsin eru nokkuð spræk eftir ferðalagið en þau verða fyrstu dagana í sérstöku búri meðan þau eru að jafna sig. Þau verða ekki flutt í sýningabúr fyrr en þau eru farin að taka æti. Vonandi verður það fljótlega því að hrognkelsi eru einstaklega fallegir og skemmtilegir fiskar.

Við þökkum Sindra Má og liði Fjarðabyggðar kærlega fyrir þessa góðu sendingu.

Orkumótsgestir

23.06.2016

Þá er Orkumótið hafið og mörg hundruð drengir mættir til að spila fótbolta í Eyjum. Margt er gert til skemmtunar milli leikja og m.a. er vinsælt að koma í heimsókn í Sæheima. Fyrstu liðin til að koma þetta árið voru Fram og HK. Greinilegt er þó að fótboltinn á hug þeirra allan því að þegar þeir skoðu tvo rituunga sem eru í uppeldi á safninu fengu þeir nöfnin Heimir Hallgríms og Lars Lagerbäck.

 

Hjálplegar stelpur

20.06.2016

Þessar stelpur heita Andrea og Birta og eru báðar eyjapæjur þó svo að þær eigi heima á fastalandinu. Þær eru svo heppnar að eiga afa og ömmur hér í Eyjum og koma því oft í heimsókn. Þær nota þá tækifærið og kíkja við í Sæheimum þar sem þær hjálpa til. Þær segja t.d. ferðamönnum söguna af Tóta lunda á fullkominni ensku. Einnig hjálpa þær til við að gefa starraunganum og rituungum að éta og margt fleira. 

Rituungar

20.06.2016

Þá er tími rituunganna hafinn. Árlega er komið með rituunga í Sæheima sem hafa fallið úr hreiðrum sínum við Skiphella. Oft eru það eldri ungar sem ýta þeim fram af syllunum í baráttu um  fæðuna sem foreldrarnir koma með. Þó þeir séu oft afar smáir við komuna á safnið ná þeir flestir að vaxa og dafna hjá okkur. Þegar þeir eru orðnir fleygir er þeim sleppt. Margir kjósa að ala þá heima og getur það verið mjög skemmtilegt.

Sjómannadagur

03.06.2016

Á sjómannadaginn verður opið í Sæheimum kl. 10-17 og safnið býður bæjarbúum að koma í heimsókn. Opið er alla helgina en frítt inn á sunnudeginum.

Við óskum sjómönnum til hamingju með daginn og þökkum þeim fyrir góðar gjafir til safnsins.

Fyrsta flugið

01.06.2016

Greinilegt er að litli starraunginn, Goggi galvaski, fær nóg að éta hjá okkur. Enda eru krakkarnir dugleg að færa honum ánamaðka, sem hann gleypir í sig með mikilli áfergju. Það er með ólíkindum hvað hann hefur vaxið og dafnað á þessum 12 dögum sem liðnir eru frá því að komið var með hann á safnið. Í dag tók hann flugið í fyrsta skipti og valdi höfuðið á einum starfsmanni safnsins til lendingar.