News

Drangavíkin með tvo tröllakrabba

22.05.2017

Áhöfnin á Drangavík VE kom færandi hendi er þeir komu að landi í gærkvöldi. Þeir gáfu Sæheimum tvo tröllakrabba, nornakrabba, kolkrabba og krossfiska. Þeir höfðu haldið tröllakröbbunum á lífi í rúma viku og þótti sumum þeir bjartsýnir að halda að krabbarnir myndu lifa þangað til að þeir næðu höfn. Af því tilefni fengu þeir nöfnin Bjartur og Birta. Þeir eru nú komnir í búr á safninu og eru bara nokkuð sprækir þrátt fyrir langt ferðalag.

Tannkrabbi af Drangavík

08.05.2017

Áhöfn Drangavíkur VE kom enn og aftur færandi hendi í Sæheima. Nú færðu þeir safninu stóran og flottan tannkrabba. Einn tannkrabbi er fyrir á safninu en er hann mun minni en þessi.

Tannkrabbar eru náskyldir töskukrabba og grjótakrabba og eru þeir mjög líkir honum. Tannkrabbann má þó þekkja á tenntum geirum á skjaldarröndinni sem krabbinn dregur nafn sitt af.

Heimkynni tannkrabba eru í sjónum frá Írlandi að Kanaríeyjum og finnast þeir allt niður á 400 metra dýpi. Þeir koma einstöku sinnum í veiðarfæri báta suður af Íslandi og þegar það gerist er um að gera að setja þá í sjófyllt kar og færa Sæheimum að gjöf. 

Blágóma af Drangavík

28.04.2017

Drangavík VE kom til hafnar í morgun og var áhöfnin með þessa flottu blágómu sem þeir færði safninu að gjöf. Hún er líklega orðin nokkuð gömul og er um meter að lengd. Stærsta blágóma sem hefur veiðst við Ísland var 1,26 metri. Hún ber þess merki að hafa lent í ýmsu um ævina og er m.a. með ör á síðunni eftir sæsteinsugu.

Blágóma er skyld steinbít og hlýra og hefur fundist allt í kring um landið en er algengari í kalda sjónum fyrir norðan og austan. 

Við þökkum áhöfninni á Drangavík kærlega fyrir gjöfina.

Áhöfn Drangavíkur enn á ferð

24.04.2017

Enn og aftur hefur áhöfn Drangavíkur VE haft Sæheima í huga við veiðarnar og safnaði ýmsu spennandi í kar fyrir okkur. Í karinu mátti finna kolkrabba, humra, gaddakrabba skessukrabba, sæfífla, skötu og þessa brosmildu tindabikkju. Það eru einmitt gjafir frá sjómönnum sem skipta sköpum fyrir safnið og hafa frá upphafi lagt grunninn að starfsemi þess. Bestu þakkir fyrir góða gjöf.

Sumardagurinn fyrsti

19.04.2017

Vestmannaeyjabær býður öllum bæjarbúum að heimsækja söfn bæjarins í tilefni af sumarkomunni. Opið verður í Sæheimum á sumardaginn fyrsta klukkan 13 til 16. Allir velkomnir.

Opnunartími um páskana

12.04.2017

Opið verður í Sæheimum fiskasafni á skírdag 13. apríl kl. 13-16 og laugardaginn 15. apríl klukkan 13-16.

Drangavíkin með góða gjöf

11.04.2017

Áhöfnin á Drangavík VE kom að landi í morgun með mikinn fjölda lifandi dýra fyrir safnið. Voru þau hífð frá borði í tveimur körum og þurftu starfsmenn safnsins að flytja þau í þremur ferðum. Um var að ræða marga tugi skessukrabba, gaddakrabba og krossfiska. Einnig voru þeir með tvo stóra og flotta nornakrabba sem voru báðir um 1,3 kg að þyngd. Auk krabbanna voru í körunum þorskar, skötur og kolar. Bestu þakkir fyrir þessa flottu gjöf.

 

Kolkrabbi

10.04.2017

Áhöfnin á Vestmannaey VE kom með lifandi kolkrabba til hafnar og færðu safninu. Það voru mæðginin Ása Ingibergsdóttir og sonur hennar Ingibergur Sigmundsson sem komu með kolkrabbann á safnið. Það var mjög gott að fá kolkrabbann því að enginn slíkur var fyrir á safninu.

Keilubræður

01.04.2017

Þeir félagar Örn og Daníel lögðu krabbagildrur í Höfðavík í gær og vitjuðu .þeir um aflann í dag, Fengu þeir fjölda bogkrabba en einnig voru í gildrunni tveir keilubræður. Þessir fallegu bræður eru núna í góðu yfirlæti á safninu og kúra saman í holu undir steini.

Skrifað undir

09.11.2016

Nú um helgina var skrifað undir samning Sæheima og Uppbyggingarsjóðs Suðurlands. En sjóðurinn veitti Sæheimum 400.000 króna styrk til að vinna að verkefni sem nefnist "Lundapysjur í Vestmannaeyjabæ". Byggist verkefnið aðallega á pysjueftirliti Sæheima, sem hefur verið starfrækt frá árinu 2003. Fyrsti hluti verkefninsins var að halda sýningu á ljósmyndum frá pysjueftirlitinu árin 2015 og 2016. Næsta skref verður síðan að vinna úr tölum pysjueftirlitsins frá upphafi og gera niðurstöðurnar aðgengilegar fyrir almenning. Verða þær settar inn á heimasíðu Sæheima. Margrét Lilja Magnúsdóttir og Gígja Óskarsdóttir skrifuðu undir fyrir hönd Sæheima og Hrafn Sævaldsson fyrir hönd Uppbyggingarsjóðs Suðurlands. 

Fjöldi gesta um safnahelgi

07.11.2016

Um helgina var Safnahelgin í Vestmannaeyjum með fjölda viðburða á söfnum bæjarins. Í Sæheimum voru sýndar ljósmyndir sem teknar hafa verið af börnum sem komið hafa með pysjurnar sínar í pysjueftirlitið til okkar árin 2015 og 2016. Heildarfjöldi mynda er um 900 og eru þær allar sýndar í tveimur snertiskjám sem staðsettir eru í fiskasalnum. Rúmlega helmingur þessara mynda var prentaður og eru þær ýmist innrammaðar í andyri safnsins eða límdar upp á glerin í fuglasalnum og steinasalnum. Núna er safnið því talsvert ólíkt því sem fólk á að venjast. 

Sýningin var vel sótt og komu yfir 300 gestir til okkar. Almenn ánægja var með sýninguna og mun hún verða uppi næstu vikur, þannig að þeir sem komust ekki um helgina hafa tækifæri til að skoða sýninguna. Nú er komin vetraropnun á safninu og er það opið á laugardögum kl. 13 - 16. Þessar hressu stelpur voru meðal gesta safnsins um helgina.

Uppskeruhátíð pysjueftirlitsins

04.11.2016

Undirbúningur fyrir Safnahelgina er nú í hámarki í Sæheimum. Þar stendur til að opna ljósmyndasýningu á morgun, laugardaginn 5. október, klukkan 13. Um er að ræða ljósmyndir af börnum með pysjurnar sínar, sem komu í pysjueftirlitið árin 2015 og 2016. 

Árið 2015 fundust miklu fleiri pysjur en mörg árin þar á undan. Voru því bæjarbúar mjög spenntir að heyra nýjustu tölur um fjölda pysja. Sæheimar settu því inn fréttir nánast daglega bæði á heimasíðu safnsins og á facebook síðu þess. Til að eiga myndir með fréttunum var byrjað að taka einstaka ljósmyndir af börnum með pysjurnar sínar.

Við fundum fljótlega fyrir því að börnin voru spennt fyrir því að fá teknar af sér myndir og sérstaklega að fá þær síðan birtar með fréttunum á facebook síðunni. Það var því oft vandi fyrir starfsmenn að velja myndir með fréttunum, því ekki var nokkur leið að birta þær allar. Smám saman fórum við að taka  miklu fleiri myndir en við þurftum til birtingar með fréttunum og árið 2016 voru teknar myndir af nánast öllum sem komu með pysjur á safnið.

Við áttum því orðið mikinn fjölda ljósmynda af flottum krökkum með pysjurnar sínar og  aðeins lítið brot af þeim höfðu verið birtar á facebbook síðunni. Það var því ákveðið að  halda ljósmyndasýningu á safninu til að gefa krökkunum og öðrum bæjarbúum kost á því að skoða myndirnar. 

Því miður rötuðu ekki allar myndirnar á sýninguna vegna lakra gæða og biðjumst við velvirðingar á því. Þá er við ljósmyndarann að sakast, því fyrirsæturnar voru alltaf frábærar.  Vonandi fáum við tækifæri á næsta ári  til að taka myndir í stað þeirra sem misheppnuðust. Við þökkum öllum fyrirsætunum kærlega fyrir þáttökuna.

SASS veitti styrk til sýningarinnar og kunnum við þeim bestu þakkir fyrir.

Skrofuungar á ferð

30.09.2016

Eins og lundapysjur þá fljúga ungar skrofunnar stundum að ljósunum í bænum. Það hefur verið komið með nokkuð af skrofum til okkar í Sæheimum. Við höfum vktað þær eins og pysjurnar og 12 af þeim hafa verið merktar. Ein af skrofunum sem komið var með hafði verið merkt fyrr í sumar í Ystakletti og fannst hún við Ofanleiti. Það er um að gera að hafa augun hjá sér þó að pysjurnar séu hættar að finnast í bænum því að skrofuungarnir eru enn á ferðinni og sömuleiðis ættingjar þeirra, sjósvölurnar. Þær eru enn seinna á ferðinni og eru jafnvel að finnast fram í nóvember.

Lokatölur í pysjueftirlitinu 2016

30.09.2016

Þá er orðið útséð með að finna fleiri pysjur og því óhætt að gefa út lokatölur fyrir pysjueftirlitið 2016. Heildarfjöldi pysja var 2.639 og er þetta því næst stærsta pysjuárið frá því pysjueftirlitið hóf göngu sína árið 2003.

Meðalþyngd pysjanna í ár var nokkuð hærri en mörg síðustu ár eða 269,8 grömm. Það er talað um að lífslíkur pysjanna aukist eftir því sem þær eru þyngri og erum við því frekar bjartsýn fyrir hönd pysjanna í ár.

Komið var með fyrstu pysjuna þann 24. ágúst og þá síðustu þann 25. september og spannaði því tímabilið rúman mánuð. 

Í fyrra var komið með talsvert fleiri pysjur, eða 3.831 pysju. Þær voru að meðaltali um 30 grömmum léttari en pysjurnar í ár og miklu seinna á ferðinni, eða frá 8. september til 23. október. 

Merktar voru um 540 pysjur á þessu pysjutímabili.

 

 

 

Mette Marit flogin á braut

27.09.2016

Í janúar sögðum við frá lundapysju sem kom um borð í Kap VE á miðunum vestur af Snæfellsnesi. Fékk hún olíu í fiðrið um borð og þurfti því að hreinsa hana. Var haft á orði að pysjan hlyti að vera norsk, því að lundar frá Noregi halda sig gjarnan á þessum slóðum yfir vetrartímann. Fékk hún þá snarlega nafnið Mette Marit í höfuðið á norsku krónprinsessunni.

Lundar og aðrir fuglar sem þarf að hreinsa eru oft nokkuð lengi að ná upp nægilegri fitu í fiðrið. Fitan gerir þeim kleyft að halda vatni frá líkamanum og án hennar blotna fuglarnir mikið og geta ekki verið á sjónum. Það tók pysjuna talsverðan tíma að verða tilbúin á sjóinn. Hún hefur verið látin synda með lundunum sem fyrir eru á safninu. Smám saman gat hún verið lengur á sundi og var að lokum orðinn orðinn sundgarpur hinn mesti.

Nú á dögunum var farið með Mette Marit út á Hamar og henni sleppt þar. Hún flaug mjög langt og hvarf sjónum okkar. Núna gæti hún verið komin á slóðir norsku lundanna og er jafnvel búin að hitta ættingja og vini og hefur þá líklega frá mörgu að segja.

Líklega síðasta pysjan

27.09.2016

Aðeins hefur verið komið með þrjár pysjur síðustu vikuna í pysjueftirlit Sæheima. Á sunnudaginn kom Ragnheiður Rut með pysjuna sína, sem hafði fundist inni í dal. Mjög líklegt má telja að um sé að ræða síðustu pysjuna á þessu pysjutímabili.

Það er gaman að geta þess að á þessum degi í fyrra var pysjutíminn í hámarki. Þá voru vigtaðar 309 pysjur hjá okkur í Sæheimum og höfðu aldrei verið vigtaðar eins margar pysjur á einum degi.

Enn færri pysjur í dag

20.09.2016

Einungis var komið með átta pysjur í pysjueftirlit Sæheima í dag. Sara Rós kom með tvær þeirra. Önnur þeirra var afskaplega létt og því fékk fjölskyldan  nokkrar loðnur í poka handa henni.

Við erum enn með nokkrar pysjur í eldi hjá okkur. Sumar þeirra voru litlar og dúnaðar og þurfa aðeins nokkra daga til að losna við dúninn og þyngjast eilítið. Aðrar hafa lennt í olíu og grút og þurfti því að hreinsa þær. Eftir slíka meðferð getur það jafnvel tekið þær nokkrar vikur að ná nægjanlegri fitu í fiðrið til að halda vatni frá líkamanum. Þær eru nú á daglegum sundæfingum og styttist í brottför hjá nokkrum þeirra.

Búningaskipti hjá Tóta

20.09.2016

Lundinn eins og við þekkjum hann er í sínum litríka sumarbúningi, sem er í raun varpbúningur hans. Lundar skipta um búning bæði á vorin og haustin og eru talsvert öðruvísi útlits yfir vetrartíman.

Lundinn okkar hann Tóti er staðráðnn í því að nú sé komið haust og er kominn vel inn í búningaskiptin. Eins og sést á myndinni þá flagna þunnar plötur af goggi hans. Hvíta spöngin við rót goggsins er fallin af og guli bletturinn í munnvikinu hefur misst lit sinn og á eftir að skreppa saman. Plöturnar umhverfis augun munu einnig falla af. Smám saman mun hann síðan dökkna í vöngum.

Það er gaman að fylgjast með þessum breytingum eiga sér stað. Hjá villtum lundum eiga þær sér stað þegar þeir hafa yfirgefið varpstöðvarnar og verðum við því ekki vitni að þeim.

Aðeins 10 pysjur

19.09.2016

Pysjunum fækkar jafnt og þétt og einungis var komið með 10 pysjur í eftirlitið í dag. Greinlega er pysjutímabilið að klárast þetta árið. Pysjurnar eru nú orðnar 2619 talsins. Þetta er næst mesti fjöldi pysja frá upphafi pysjueftirlitsins, sem hófst árið 2003.

Óvenju léttar pysjur í dag

18.09.2016

Komið var með 25 pysjur í pysjueftirlitið í dag. Margar þeirra voru óvenju léttar og sú léttasta var einungis 162 grömm. Meðalþyngd pysjanna í dag er um 30 grömmum lægri en meðalþyngd allra pysjanna sem komið hefur verið með á tímabilinu.

Nú eru pysjurnar orðnar 2609 talsins.