Fréttir

Tóti

01.08.2018

Mikil sorg ríkir nú í Sæheimum því hann Tóti okkar hefur kvatt okkur. Hans verður sárt saknað bæði af starfsfólkinu og lundavinum hans á safninu. Tóti var hvers manns hugljúfi og átti aðdáendur um allan heim sem munu sömuleiðis sakna þessa ljúfa lunda. Tóti var lítill lundi, með stórt hjarta sem gladdi marga.

Með sorg í hjarta kveðjum við okkar ástkæra Tóta, minning hans lifir.

Opening hours / Opnunartími

30.07.2018

During the festival (4 th of August - 7th of August) the museum is open from 13:00 to 15:00. 

Athugið breyttan opnunartíma yfir Þjóðhátíðina. Opið er frá föstudegi til mánudags kl. 13:00 - 15:00.

Veränderte Öffnungszeiten während des Nationalfestivals. Motag - Freitag 13:00-15:00.

Changement des horaires pendant la fête nationale des îles Vestmann. Du vendredi 4 août au lundi 7 août le musée est ouvert de 13h à 15h.

Ígulker og krossfiskar

25.07.2018

Guðjón Þorri skellti sér í sjóferð með pabba sínum og afa og komu þeir að landi með fjölda ígulkerja og krossfiska. Þeir gáfu safninu aflann og voru þessar skrautlegu lífverur góð viðbót í búr safnsins.

Kolkrabbi

21.07.2018

Fyrir nokkrum dögum fékk safnið góða gjöf frá áhöfninni á Drangavík VE. Þeir færðu safninu lifandi kolkrabba, þorska, gaddakrabba. Kolkrabbinn sem þeir komu með var mjög flottur en eins og kolkrabba er siður þá var hann mjög feiminn og faldi sig milli steina. Núna er hann aftur á móti farinn að kanna nýju heimkynnin sín og flækist um búrið og er því auðvelt að skoða hann. Það er gaman að fylgjast með þessum sérkennilegu skepnum hreyfa sig um. 

Fagnandi frakkar

15.07.2018

Frönsk fjölskylda var í heimsókn á safninu meðan frakkar og króatar mættust í úrslitaleik heimsmeistaramótsins í knattspyrnu. Voru þau að vonum spennt yfir leiknum og fengu að horfa á síðustu mínúturnar í tölvunni okkar á skrifstofunni. Þau fögunuðu vel þegar flautað var til leiksloka og ljóst var að frakkar væru orðnir heimsmeistarar.

Blágóma

09.07.2018

Snemma í morgun tók starfsmaður Sæheima á móti stórri blágómu, sem áhöfnin á Drangavík kom með að landi. Var hún sett í búr með blágómunum tveimur, sem þeir færðu safninu fyrri nokkrum dögum. Þær eru núna báðar í felum á bak við stóran stein þannig að ekki hefur reynt á samkomulagið.

Blágómur og humrar

05.07.2018

Snemma í morgun kom Drangavíkin VE að landi með lifandi blágómur og leturhumra meðferðis. Starfsmaður Sæheima veitti dýrunum viðtöku á bryggjunni og færði þau til nýrra heimkynna í Sæheimum.  

Æðarunga bjargað frá máfi

30.06.2018

Nokkuð margar æðarkollur með unga halda sig þessa dagana á tjörninni í Herjólfsdal. Búið er að strekkja bönd yfir tjörnina til að varna því að máfar nái ungunum. Þeir nota þó hvert tækifæri og í dag var komið með æðarunga til okkar sem hafði verið bjargað frá máfi við tjörnina. Farið var með hann til kollunnar en var of dasaður til að ná að fylgja henni. Því var komið með hann til okkar í Sæheimum og var þar hlúð að honum og fékk hann gómsæt og næringarrík loðnuhrogn að éta. Í lok dagsins var hann orðinn vel sprækur og því var farið með hann að tjörninni og honum sleppt þar. Hann synti að næstu kollu og slóst í hóp með ungunum hennar. 

Æðarkollur taka gjarnan unga í fóstur sem blandast þá ungahópnum þeirra og oft má sjá nokkrar kollur saman með stóran ungahóp. Það er því jafnan lang best að fara með æðarunga sem finnast beint að næstu kollu og sjá hvort að hún sé ekki tilbúin að taka við honum.

Geirnyt og ýmislegt fleira

11.06.2018

Áhöfnin á Drangavík VE kom enn á ný færandi hendi í morgun og voru með ýmsar óvenjulegar tegundir í farteskinu. Geirnyt, lúður, blágóma, sæfíflar og sæbjúgu voru meðal þess sem þeir komu með að landi og færðu Sæheimum að gjöf. 

Geirnyt eru mjög óvenjulegir og fallegir fiskar, sem eru brjóskfiskar og því skyldir skötum, háfum og hákörlum. Heimkynni þeirra eru í austanverðu Atlantshafi og í sjónum suður af Íslandi. Geirnytin eru botnfiskar sem lifa á talsverðu dýpi og er því mikill munur á þrýstingi þar og í búrum safnsins. Vonandi ná þau að jafna sig og gleðja gesti safnins með veru sinni hér.

Músarungi

09.06.2018

Þrjár ungar stúlkur, þær Anna, Ásta og Emma, björguðu litlum músarunga úr klóm kattar og komu með hann í Sæheima. Unginn var nokkuð veikburða en hefur braggast ágætlega og er nú farinn að gæða sér á ávöxtum og korni. Litla músin hefur fengið nafnið Heiða. 

Drangavík með góða gjöf

01.06.2018

Snemma í morgun kom Drangavík VE að landi og hafði áhöfnin tekið til hliðar nokkra fiska og fleira skemmtilegt fyrir Sæheima. Færðu þeir safninu lúður, tindabikkjur, skötu, gaddakrabba, sæbjúgu og marglyttur. Lúðurnar brostu sínu blíðasta til ljósmyndarans.

Lunda sleppt við Kaplagjótu

31.05.2018

Fyrir nokkrum dögum komu þeir Logi Snædal og Nökkvi Óðinsson með slasaðan lunda sem þeir höfðu fundið inni í Dal. Var hann með höfuðáverka og var greinilega vankaður. Var hann mun hressari strax næsta dag og tók þá æti. Nú hefur hann fengið að jafna sig í nokkra daga og fengið vel að éta.

Í dag var farið með lundann að Kaplagjótu og honum gefið frelsi. Hópur ferðamanna á vegum EyjaTours var á svæðinu og fylgdust þeir spenntir með.

Teistan frjáls

24.05.2018

Fyrr í vetur var komið með mikið olíublauta teistu til okkar í Sæheima, sem hafði fundist úti í Klauf. Var hún hreinsuð í tvígang en síðan tóku við strangar sundæfingar. Það tók teistuna þó nokkurn tíma að ná upp nægjanlegri fitu í fiðrið til að halda vatni frá líkamanum. En upp á síðkastið gat hún synt í langan tíma án þess að blotna og því var því ákveðið að gefa henni frelsi. Var farið með hana á svipaðar slóðir og hún fannst og henni sleppt þar.

Vankaður lundi

22.05.2018

Í gærkvöldi fannst fullorðinn lundi við Heimaklett sem var eitthvað vankaður. Finnendur hans komu með hann í Sæheima í dag til að láta líta á hann. Hann virtist hinn sprækasti og var því útskrifaður. Var honum sleppt á sama stað og hann hafði fundist.

Samningar við SASS

07.05.2018

Tvisvar á ári veitir Uppbyggingarsjóður Suðurlands verkefnastyrki til nýsköpunar, menningar og atvinnuþróunar á Suðurlandi. Sæheimar hlutu þrjá verkefnastyrki við síðustu úthlutun og fyrr í dag undirrituðu Margrét Lilja Magnúsdóttir og Örn Hilmisson samningana fyrir hönd Sæheima og Hrafn Sævaldsson fyrir hönd sjóðsins. Verkefnin sem hlutu styrk voru "Lundaafbrigði", "Pysjusýning 2018" og "Samfélagsvæðing safnanna". 

Styrkir sem þessir eru afskaplega mikilvægir fyrir söfn eins og Sæheima og gerir okkur kleyft að vinna fjölda verkefna, sem hefðu annars aldrei orðið að veruleika. Við þökkum SASS ogg uppbyggingarsjóðnum kærlega fyrir veittan stuðning.

Sumaropnun safnsins

30.04.2018

Frá og með 1. maí eru Sæheimar opnir klukkan 10 til 17 alla daga. 

Tóti er kominn í mikið sumarskap en er þó ekki alveg kominn yfir í sumarbúninginn sinn en hann er óvenju seinn þetta árið. Við sjáum þó breytingar á honum dag frá degi og verður hann von bráðar kominn í fullan skrúða.  

Sjónvarpsþáttur

30.04.2018

Við fengum frábæra heimsókn síðasta sumar þegar tökulið frá CBS news kom og fylgdist með pysjueftirlitinu hjá okkur. Þátturinn var sýndur ytra í gær. Ætla má að um 6 milljónir manna horfi á Sunday morning á CBS og er þetta því frábær kynning fyrir okkur og Eyjarnar. Augljóst er að þátturinn hefur vakið mikla athygli en við erum strax byrjuð að fá fyrirspurnir um komandi pysjutímabil sem og um lunda almennt.

Á myndinni er Aron Sindrason, sem lék eitt af aðalhlutverkunum. Sjá má þáttinn á slóðinni hér fyrir neðan:

https://www.cbsnews.com/news/a-childrens-puffin-rescue-squad-heimaey-island-iceland/

Dúfa fær frelsi

27.04.2018

Fyrir áramót var komið með dúfu í Sæheima sem var illa haldin. Hafði hún fengið einhvers konar matarolíu eða feiti í allt fiðrið og var mjög blaut og horuð. Hún tók strax vel til matar síns og hresstist fljótlega en erfiðlega gekk að hreinsa hana. Fiður hennar var nú loksins orðið hreint á ný og var henni því sleppt í garði í nágrenni safnsins og flaug hún hin ánægðasta á vit frelsisins.

Rauðsprettan hrognafull

20.04.2018

Við sögðum frá því um daginn að safninu hafi borist mjög sérstakt afbrigði af rauðsprettu. Hún dafnar vel og hefur aðlagst nýjum heimkynnum. Hún er tekin að gildna nokkuð um miðjuna og er því greinilega hrognafull. 

Skelskipti nornakrabba

20.04.2018

Krabbar eru með harða ytri skel sem ver líkama þeirra. Þegar þeir stækka lenda þeir í smá vandræðum því að skelin gefur ekkert eftir. Þá þurfa þeir að losa sig við gömlu skelina og búa til nýja og rýmri skel utan um líkamann.

Einn af nornakröbbunum okkar hafði skelskipti í nótt og á myndinni má sjá krabbann og gömlu skelina hans vinstra megin við hann. Núna er krabbinn mjúkur viðkomu. Áður en skel hans harðnar á ný mun hann dæla sjó inn í líkamann og belgja sig eins mikið út og hann mögulega getur þannig að nýja skelin verði eins rúm og mögulegt er og hann geti vaxið sem mest áður en hann þarf að hafa skelskipti á ný. 

Meðan á skelskiptum stendur er krabbinn mjög varnarlaus og þurfum við því að varna því að hinir krabbarnir í búrinu ráðist á hann. Voru þeir að endingu fjarlægðir úr búrinu. Þó að samkomulagið hjá þeim sé alla jafna nokkuð gott þá ristir vinskapurinn ekki mjög djúpt og þeim finnst ekkert tiltökumál að éta vini sína.